"Ny fitiavana tsy ho levona mandrakizay; fa raha ny faminaniana, dia ho levona; na ny fiteny tsy fantatra, dia hitsahatra; na ny fahalalana, dia ho foana." - 1 Kôr. 13:8.
Mofon’aina:
Manantena ny tsirairay hanao asa fanompoana manokana Andriamanitra, dia izay rehetra nanankinany ny fahalalana ny fahamarinana ho an' izao andro izao. Tsy ny rehetra no afaka manao asa misiônera any amin'ny firenen-kafa, saingy ny rehetra dia afaka ny ho misiônera eo an-toerana, ao amin'ny fianakaviany sy eo amin'ny manodidina azy. (...) Ny fiainana kristianina tia manampy sy tsy misy fitiavan-tena no iray amin'ireo fomba mahomby indrindra amin'izany.
Ireo izay miady mafy amin'ny fiainana dia hahazo famelombelomana sy fankaherezana amin'ny alalan'ny fanehoam-pitiavana kely izay tsy mitaky fandaniana akory. Ny teny mamy sy ny fikarakarana madinidinika atao amim-pahatsorana, dia hampisava ny rahon'ny fakam-panahy sy ny fisalasalana mitatao eo ambonin'ny fanahiny. Ny fanehoana firaisam-po marina tahaka ny an' i Kristy, dia manan-kery hanokatra ny varavaran' ireo fo izay mila ny fikasihana tsotra sy malefaky ny toe-tsain' i Kristy.
Raisin' i Kristy amim-pifaliana tokoa ny olona rehetra manolo-tena ho Azy. Ataony miara-miasa amin'ny olombelona ny lanitra mba hanambarana amin'izao tontolo izao ny zava-miafin'Ilay Fitiavana tonga nofo. Resaho izany, ataovy antom-bavaka, hirao, fenoy amin'ny hafa-pahamarinany izao tontolo izao, ary mandrosoa hatrany hanatratra ireo faritra rehetra any lavitra any. (...)
Ho tena feno fitiavana an'Andriamanitra ireo izay niova fo marina, ka haniry fatratra hizara amin'ny hafa ny fifaliana ao anatiny.
Irin'ny Tompo ny hanehoan'ny fiangonany amin'izao tontolo izao ny hatsaran'ny fahamasinana. Nokendrena haneho ny herin'ny fivavahana kristianina izany. (...) Tsy maintsy atao ren'ireo izay ao anatin'ny haizina ny hiram-pisaorana sy fiderana.
Aoka hasehontsika amin'ny fiezahan-tsika hanasoa ny hafa ny fankasitrahantsika noho ny vaovao mahafalin'ny filazantsara, noho ireo teny fikasana sy toky raketiny. Hampita tara-pahazavan'ny fahamarinana avy any an-danitra amin'ireo fanahy sasatra sy very hevitra ary mijaly ny fanaovantsika izany. Toy ny loharano mamelombelona ny mpandeha ana sy mangetaheta io. Eo mandrakariva ny anjelin' Andriamanitra isaky ny misy asam-pamindrampo sy asam-pitiavana atao. — TFC, b. 9, tt. 30,31.