"Fa Izao no lazain'ny Tompo, dia Jehôvah , ny Iray Masin'ny Isiraely: Amin 'ny fiverenana sy ny fitsaharana no hamonjena anareo, amin 'ny fanginana sy ny fahatokiana no hisian 'ny herinareo; nefa tsy nety hianareo." – Isa. 30:15.
Mofon’aina:
Hitan'Andriamanitra ny ezaka rehetra ataonao mba hanatrarana ny filamatra efa napetrany ho anao. Rehefa tsy mahomby ianao, rehefa voafandrika hanota, dia aza mihevitra fa hoe tsy afaka mivavaka, na koa tsy mendrika hankeo anatrehan'Andriamanitra. (...) Amin' ny sandry mitsotra no hiandrasany hisakambina ilay nania. Manatôna Azy, ary lazao Azy ny fahadisoanao sy ny tsy fahombiazanao. Angataho Izy hanatanjaka anao ho amin'ny ezaka vaovao. Tsy handiso fanantenana anao Izy na hanararaotra ny fitokisanao Aminy. (...)
Hihatra aminao ny fizahan-toetra. Amin' izany no handaman'ny Tompo ny marokoroko amin'ny toetranao. Aza mimonomonona. (...) Na dia misy manisy ratsy anao aza, dia hazony ao am-ponao ny fitiavana an'Andriamanitra. (...)
Fantatr'i Kristy ny herin'ny fakam-panahy mihatra aminao sy ny hery hoentinao manohitra izany. Ny sandriny dia mitsotra mandrakariva, miantra sy manambitamby ny zanany ory rehetra. Ho an' izay alaim-panahy na kivy dia hoy Izy: Anaka, ianao no antony nijaliako sy nahafatesako, afaka matoky Ahy ve ianao? (...)
Tsy misy teny mahalaza ny fiadanana sy ny fifaliana ananan'izay mihazona an'Andriamanitra amin'ny Teniny. Tsy mampaninona azy ny fitsapana ary tsy manafintohina azy ny fanevatevana. Voahombo ny izaho. Mety hihamavesatra isan'andro ny adidiny, mety hihamahery koa ny fakam-panahy mamely azy, ary mety hihamafy ny fitsapana, nefa tsy milofika izy, satria mandray hery mifanentana amin' izay ilainy hiatrehana izany. — YI, 26 Jona 1902.
(...) I Kristy tsy nanome toky tsy akory fa zavatra mora ny hahatrarana ny fahatanterahan'ny toetra amam-panahy.(...) Ny toetra amam-panahy ambony dia azo noho ny fiezahan'ny tena manokana amin'ny alalan'ny fahamendrehana sy ny fahasoavan'i Kristy. Manome antsika ny talenta sy ny fahaizana Andriamanitra; anjarantsika ny mamolavola ny toetra amam-panahy.(...) Tokony hokianintsika akaiky ny tenantsika ka tsy avelantsika hisy lafiny iray tsy ho voahitsy. (...)-HF, t. 339 (ed. 2004)