"Koa samy hotsaraiko araka ny ataonareo avy hianareo, ry taranak 'Isiraely, hoy Jehovah Tompo. Mitodiha, ka mibebaha amin 'ny fahadisoanareo rehetra, dia tsy ho tonga fahatafintohinana mahameloka anareo intsony izany".–Ezek. 18:30.
Mofon’aina:
I Nikodemosy ilay manam-pahaizana dia nandalina ireo faminaniana lehibe [toy ny
Sal. 51:10-13; Ezek. 36:26, 27]; tsy takatry ny sainy izany fahiny, fa izao dia nanomboka nahatakatra ny tena heviny izy. Nanomboka takany koa fa na dia ny olona marina sy mendri-kaja toa azy aza dia tsy maintsy mandalo amin' ny fanandraman'ny fahateraham-baovao ao amin'i Jesosy Kristy. Izany no fepetra tokana haha-voavonjy azy sy hahafahany miditra ao amin'ny fanjakan ' Andriamanitra. (…)
(...) Tsy misy zavatra noforonin'ny olombelona mety hahasitrana ny fanahy manota. Amin'ny alalan'ny fibebahana sy ny fietrena ihany, ary amin'ny fi leferana amin' ireo fitakian' ny lanitra no hahatanteraka ny asan'ny fahasoavana. (...)
Tsy misy afa-tsy ny fanekena sy ny fampiharana ny fahamarinan'ny lanitra ihany no manokatra ny varavaran'ny fanjakan'Andriamanitra ho an'ny olombelona. Ny fo madio sy mietry, mpankatò sy manam-pitiavana, ary mijoro amin'ny finoana sy ny fanompoana ny Tsitoha ihany no afaka hiditra any. Hoy koa i Jesosy: "Ary tahaka ny nanandratan’i Mosesy ny menarana tany an-efitra no tsy maintsy hanandratana ny Zanak 'olona, mba hanana fiainana mandrakizay izay rehetra mino Azy."- Jao. 3:14, 15.
Ny menarana tany an'efitra dia nahantona tamin'ny hazo lava teo anatrehan'ny vahoaka, mba hahazoan'izay rehetra voakaikitry ny menarana afo ka efa ho faty mijery ilay menarana varahina, izay tandindon'i Kristy, ary ho sitrana avy hatrany. Tsy maintsy mijery amin'ny finoana anefa izy ireo, raha tsy izany, dia tsy hisy vokany izany. Toy izany koa no tsy maintsy ijeren'ny olona amin' izao andro izao ny Zanak'olona ho Mpamonjy azy, mba hahazoany ny fiainana mandrakizay. Nihataka tamin'Andriamanitra noho ny fahotany ny taranak'olombelona. Nitondra ny maha-Andriamanitra Azy teto an-tany i Kristy, nitafy ny maha-olombelona, mba hamonjena ny taranak'olombelona (...). Ratsy ny toetry ny olombelona, ary tsy maintsy ovana ny toetra mba hahatonga azy hifandrindra amin'ny fahadiovana sy ny fahamasinana any amin'ny fanjakan'Andriamanitra mandrakizay. Izany fiovana izany no fahateraham-baovao.— ST, 15 Nôvambra 1883.