"Fa Andriamanitra, Izay manan-karena amin 'ny famindrampo, noho ny halehiben 'ny fitiavany izay nitiavany antsika, na dia fony mbola matin 'ny fahadisoana aza isika, dia nahavelona antsika niaraka tamin'i Kristy ary niara-natsangany isika ka niara-napetrany any an-danitra ao amin 'i Kristy Jesôsy ." - Efes. 2:4-6.
Mofon’aina :
Nanolotra ny tenany i Kristy ho fanavotana ny taranak'olombelona, mba hahazoan'izay rehetra mino Azy ny fiainana mandrakizay. Ireo izay mankasitraka izany sorona lehibe izany dia mandray avy amin'ny Mpamonjy ny fanomezana sarobidy indrindra: fo madio. Fanandramana sarobidy lavitra noho ny volamena sy ny volafotsy ary ny vatosoa no azony. Miara-mipetraka amin'i Kristy any an-danitra izy ireo ka mifaly amin'ny firaisana Aminy ao anatin'ny fifaliana sy fiadanana izay tsy misy afaka manome afa-tsy Izy irery ihany. Tia Azy amin'ny fony sy ny sainy ary ny fanahiny sy ny heriny rehetra izy ireo, noho ny fahatsapany ny tenany ho lova novidin'i Kristy tamin'ny rany. Tsy manjavozavo noho ny fomba fanao sy ny tanjona araka izao tontolo izao ny masom-panahiny, ary iray amin'i Kristy izy tahaka ny maha iray Azy amin'ny Ray.
Kristy "nanolotra ny tenany hamonjy antsika, mba hanavotany antsika ho afaka amin'ny ota rehetra, sy hanadiovany izay olona ho an'ny tenany, sady ho muzoto indrindra amin'ny asa tsara" - Tit. 2:14. Fanatitra feno tokoa no nataony mba hahafahan'ny tsirairay manatratra ny fenitry ny fahatanterahana noho ny Fahasoavany. Ary toy izao no hosoratana ao amin'ny bokin'ny fiainana momba ireo izay mandray ny Fahasoavany sy manaraka ny ohatra nasehony: "Tanteraka ao Aminy, tsy misy pentimpentina na loto".
"Isaorana anie Andriamanitra Rain 'i Jesôsy Kristy Tompontsika Izay nitahy antsika tao amin 'i Kristy amin' ny .fitahiam-panahy rehetra any an-danitra." - Efes. 1:3. Inona no tokony mbola hangatahintsika, izay tsy ao anatin' izany fanomezana be dia be sy feno famindrampo izany? Amin'ny alalan'ny fahamendrehan'i Kristy no itahiana antsika amin'ny fitahiana ara-panahin'ny lanitra rehetra ao amin'i Kristy. Tombontsoa lehibe ho antsika ny manakaiky an'Andriamanitra, mba hiaina ny Fanatrehany. (...) Tsy misy zavatra hafa mitondra fiadanana sy fahafahana ary herim-po sy tanjaka ho antsika afa-tsy ny mitoetra eo amin'ny fanatrehan'i Kristy. — RH, 30 Mey 1907.