"Ary Izy nitondra ny fahotantsika tamin 'ny tenany teo ambonin 'ny hazo, mba ho faty ny amin 'ny ota isika, fa ho velona ny amin 'ny fahamarinana; ary ny dian-kapoka taminy no nahasitranana anareo." — I Pet. 2:24.
Mofon’aina:
Raha toa ianao ampidirina am-ponja sy helohina ho faty noho ny heloka bevava vitanao, ary misy sakaizanao iray manatona anao ka manao hoe: "Izaho no hisolo ny toeranao, fa ianao kosa hafahana." Moa ve ny fonao tsy ho feno fankasitrahana noho izany fitiavana tsy mihevitra ny azy izany? Mihoatra noho izany anefa no efa nataon' i Kristy (...) ho antsika. Efa very isika, voaheloka ho faty, kanefa maty ho antsika i Kristy ka nanafaka antsika noho izany. Hoy Izy: "Izaho no hitondra ny heloky ny mpanota, mba hahazoany fahafahana indray. Homeko azy ny hery hoentiny mandresy ao anatin'ny ady itolomany amin'ny ratsy."
Izany no toerana misy ny olombelona ankehitriny. Novidin'i Kristy tamin'ny ainy isika ka Azy. Ny herintsika rehetra, na ara-batana, na ara-tsaina, na ara-panahy dia Azy avokoa. Ary fandrobana ny fihazonantsika izay Azy mba ho an'ny tenantsika. - Ms 11, 1885.
Alao sary an-tsaina, (...) ny hamafin' ny fijaliana niaretan' Kristy. Niaritra izany fijaliana izany tao amin'ny maha Olombelona Azy [zy mba tsy hirotsahan'ny fahatezeran'Andriamanitra mirehitra amin'ireo rehetra nanolorany ny ainy. Eny tokoa, hanan-kery mandrakizay ho an'ny fiangonana izany sorona lehibe izany. Haintsika ve ny manisa ny fandikan-dalàna efa vitan'ny fiangonana? Tsy haintsika izany. Koa iza àry no afaka hahatakatra ny fijalian'i Kristy rehefa nitsangana ho antoka ho an'ny fiangonany Izy? (...) Tao amin'ny fanatitra nataon' ilay Zanaka Lahitokan'Andriamanitra no nanehoana ny voninahitra mahatahotry ny fahamarinan'Andriamanitra sy ny fahamasinany. - Ms 6. 1897
Noraisin'i Kristy ho andraikiny ny lehilahy sy ny vehivavy rehetra eto an-tany ka natolony ho azy ireo ny ainy. Mijoro eo anatrehan'ny Ray lzy ka manao hoe: "Ray o, raisiko ny helok' ity fanahy ity. Ho faty izy raha avela hivesatra izany. Fa raha mibebaka kosa izy, dia ho voavela heloka. Ny rako no hanadio azy amin'ny fahotana rehetra. Natolotro ny aiko noho ny fahotan' izao tontolo izao." - Ms 127, 1899.