"Fa tsy misy mahay manao fanorenana hafa afa-tsy izay natao, dia Jesosy Kristy. Ary raha misy mandrafitra volamena, na volafotsy, na vato tsara, na hazo, na bozaka, na mololo, eo ambonin 'ny fanorenana, dia aseho avokoa ny asan'ny olona rehetra; fa ny andro no hampiseho azy, satria haseho amin 'afo izany andro izany, ka dia hozahan-toetra amin'ny afo ny asan'ny olona rehetra." — 1 Kôr. 3:11-13.
Mofon’aina:
Tahaka ny afo mampiseho sy manavaka ny volamena, ny volafotsy, ny vato tsara, ny hazo, ny bozaka, ary ny mololo, dia toy izany koa ny andro fitsarana izay hisedra ny toetran'ny olona, ka ho hita miavaka ny toetra voatefy tahaka ny an'i Kristy sy ny toetra voavolavolan'ny fo feno fitiavan-tena. (...) Ho levona izay rehetra tsy misy vidiny, fa ny tena volamena kosa, dia ny finoana tsotra sy manetry tena, dia tsy ho levona mandrakizay; tsy mba mety lo mantsy izany. — SDABC, b. 6, tt. 1087,1088.
Na iza na iza dia mety ho tonga araka izay tiany hahatongavana. Tsy azo amin'ny alalan'ny fanabeazana, na amin'ny fanangonan-karena, na fahazoana von i nahitra araka izao tontolo izao, ny toetra maha-izy ny olona iray. (...) Mila manohitra mandrakariva ny herin'ny maizina isika raha irintsika ny hitehirizana ny anarantsika ao amin'ny bokin'ny fiainana. Tsy tsara lavitra ve ny hanana ny anarantsika ao amin'izany boky izany mba hiarahantsika monina amin'ny anjelin'ny lanitramandrakizay, toy izay ny hoderaina eto amin'ity tany ity? — RH, 21 Desambra 1886.
Mandritra ny androm-pahasoavana omena antsika eto dia samy manorina toetra hotsarain'Ilay Mpitsara ny tany rehetra isika. (...) Ny asa tsirairay ataontsika eo amin'ny fiainana dia toy ny vato arafitra ho trano iray, ny fahaiza-inanao tsirairay no mpandrafitra azy, ny kapoka tsirairay amin'izany dia na ho amin'ny tsara na ho amin'ny ratsy. Mampitandrina antsika ny Soratra Masina mba handinika tsara raha azo antoka ny fanorenantsika. Raha eo ambonin'ny vatolampy isika no manorina, eo amin'ny asa madio sy mendrika ary marina, dia ho kanto sy tsara rafitra ny tranontsika, ho tempoly azon' ny Fanahy Masina onenana. — Y1, 10 Jona 1897.