«Izay soratra rehetra nomen'ny tsindrimandrin'Andriamanitra dia mahasoa koa ho fampianarana, ho fandresen-dahatra, ho fanitsiana izay diso, ho fitaizana amin 'ny fahamarinana, mba ho tanteraka ny olon'Andriamanitra, ho vonona tsara ho amin 'ny asa tsara rehetra.» - 2 Tim. 3:16,17.
Mofon’aina:
Ao amin'ny Tenin'Andriamanitra no ahitana izay rehetra ilaina ho amin'ny fanatanterahana ny olon'Andriamanitra. Toy ny trano firaketana harena izay feno zava-tsoa sarobidy sy soa izany, nefa tsy takatsika ny hasarobidiny sy ny ilantsika mampiasa ny raki-tsarobidin 'ny fahamarinana. Tsy tsapantsika ny maha zava-dehibe ny fandalinana ny Soratra Masina ho an'ny tenantsika. Maro no manao tsirambina ny fianarana ny Tenin'Andriamanitra noho ny fitadiavana tombontsoa ara-nofo na ny fanaranam-po amin'ny fialamboly tsy misy lanjany loatra. Oh, tsy aleontsika ve ny zavatra rehetra araka izao tontolo izao no ajanona toy izay ny fandinihana ny Tenin'Andriamanitra, izay mampahendry antsika ho amin'ny fiainana mandrakizay? Ilay boky ambonin'ny boky rehetra, izay «nomen 'ny tsindrimandrin ' Andriamanitra» (...) no mendrika indrindra ny fahalianantsika sy ny fanajantsika.
Mifandray ety dia ety amie' izay mandinika marina ny Soratra Masina amin'ny fo ny Fanahin'Andriamanitra, eo am-pikatsahany ny fahamarinana nambara avy any an-danitra. Manokatra ny saina ny fahatakarana ny sitrapon' Andriamanitra nambara, manitatra, manandratra, ary manome hery vaovao amin'ny alalan'ny fampiraisana ny fahaizany amin'ny fahamarinana lehibe. (...)
Miankina amin'ny halalin'ireo lohahevitra ifankazarany ny fahatakaran'ny saina. Raha mianatra Baiboly ny olona rehetra, dia handroso kokoa ny vahoaka, hahay hieritreritra lalindalina kokoa, ary haneho faharanitan-tsaina kokoa noho ireo izay nandalina tamim-pahazotoana ny siansa sy ny tantaran'izao tontolo izao, fa tsy ny Baiboly. Ho an'izay mikatsaka amin-kitsim-po ny fahamarinana, dia manofana ny saina ho amin'ny fahamboniana ny Baiboly, ary mitombo ny faharanitan'ny sainy noho ny fibanjinany ireo zava-panahy; mietry ny «izaho», fa Andriamanitra sy ny fahamarinany nambara kosa no misandratra. - ST, 30 Janoary 1893.
Ny Baiboly no fenitra lehibe famantarana ny tsara sy ny ratsy, mamaritra mazava ny atao hoe fahotana sy ny atao hoe fahamarinana. Ireo foto-kevitra velona raketiny, izay toy ny kofehy volamena voatenona eo amin'ny fiainantsika, no fiarovana tokana ho antsika manoloana ny fitsapana sy ny fakam-panahy. — RH, 11 Jona 1908.