«Hoy Izy: Tandremo mba hataonao araka ny endrika izay naseho taminao tao an-tendrombohitra ny zavatra rehetra.» Heb. 8:5.
Mofon’aina:
Nanome lesona manan-danja ho an'ny vahoakany hatramin'izay ka hatramin'izao ny Tompo rehefa nanome toromarika an'i Mosesy teo an-tendrombohitra momba ny fanorenana ny tabernakely. Nitaky fahatanterahana hatramin'ny tsipiriany kely indrindra tamin'izany Izy.
Eo anivon'ny faharatsian' izao tontolo izao mihasahisahy, sy ny fampianaran-dratsy mihamahazo laka, dia tsy maintsy aseho mazava eo amin'ny fiainan'ireo lehilahy sy vehivavy niova fo ny fampianaran'i Kristy. (…)
Tokony hisaintsaina mandrakariva ny fiainana mandrakizay ny Kristianina amin'izay ataony rehetra. Na mikasika ny fambolena na fikirakirana milina ny asany, dia azony atao araka ny modely avy any an-danitra izany (...). Noho ny fahasoavan'i Kristy, ny zavatra rehetra dia natao hamolavolana fahatanterahan-toetra, tahaka ny an'i Kristy, ary omem-boninahitra Andriamanitra rehefa maneho ny foto-kevitry ny lanitra ny olony, na eo amin'ny fifandraisany amin'ny fiarahamonina na eo amin'ny fanaovany ny raharahany. (...)
Mitaky fahitsiana Andriamanitra, manomboka amin'ny zavatra bitika indrindra ka hatramin'ny lehibe indrindra. Ny lehilahy sy vehivavy, izay miezaka manatanteraka ny sitrapon'Andriamanitra an-tsipiriany, sy manao izay ahitana taratra ny any an-danitra eo amin'ny asa rehetra ataony etY an-tany, no hekena hiditra any an-dapan'ny lanitra amin'ny farany. (...)
Nidina tety an-tany ny Zanak'Andriamanitra mba ho hitan'ny lehilahy sy vehivavy ao Aminy ny atao hoe fahatanterahan-toetra, izay hany azon'Andriamanitra ekena. Noho ny fahasoavan'i Kristy dia efa natao ny fomba rehetra mba hamonjena ny taranak'olombelona. Azon'ireo mitonona ho Kristianina atao tokoa ny ho madio amin'ny asany rehetra, tahaka ny asan'i Kristy. Sarobidy eo imason'Andriamanitra toy ny Zanany malalany ny fanahy izay manaiky hatsarain'i Kristy sy maka ho an'ny tenany ny fahamendrehan'ny fiainan'i Kristy. — RH, 11 Janoary 1912.