" Ary, indro, Izaho momba anareo mandrakariva ambara-pahatongan’ny fahataperan’izao tontolo izao. ". Matio 28:20.
Mofon’aina: Mahazo matoky tokoa isika fa raha mampilefitra ny sitrapontsika isan’andro amin’Andriamanitra, dia ho tanteraka ny teny fikasana hoe: "tamin'ny fahafenoany no nandraisantsika rehetra, dia fahasoavana anampy fahasoavana." – Jao. 1:16. (...) Natao haneho ny fahasoavany eo amin’ny fiainantsika isika, eo amin’ny fisainana, ny teny, ary ny asantsika. (...) Natao haneho famindram-po, fitiavana, ary ny herin’i Kristy isika — ilay hery izay nomeny antsika. (...)
Tsy hanana hery isika raha tsy noho ny hery raisina amin’ny alalan’i Kristy. I Kristy kosa manana ny hery rehetra. Hoy Izy: "Efa nomena Ahy ny fahefana rehetra any an-danitra sy etÿ an-tany; koa mandehana hianareo, dia ataovy mpianatra ny firenena rehetra. (...) Ary, indro, Izaho momba anareo mandrakariva ambara-pahatongan’ny fahataperan’izao tontolo izao.” Izany no hery sy fampiononana antsika. (...) Izy no manampy amin’ny fanatanterahana ny adidy, mitari-dalana, mampahery, manamasina sy manohana, ary mampahomby ny teny lazaintsika izay hisarika ny sain’ny hafa ho amin’i Kristy, sy hampifoha ao aminy ny faniriana hahatakatra ny fanantenana sy ny hevitry ny fahamarinana, mampitodika azy ireo hiala amin’ny maizina ho amin’ny mazava. (...)
Mahavariana tokoa ny mieritreritra fa afaka manonona ny tenin’Andriamanitra ny olombelona, amin’ny alalan’ny teny tsotra feno fampiononana sy fampaherezana. Ny fitaovana tsotra indrindra no hampiasain’Andriamanitra hamafazana ny voan’ny fahamarinana— fiheverana feno hatsaram-panahy, teny mamy – izay mety hitsiry sy hamoa, satria i Jesosy Ilay niteny hoe: "Indro, Izaho momba anareo mandrakariva" no nampahomby izany tao am-pon’ilay namafazana azy.
Omena antsika koa ny teny fikasana ny amin’ny fanatrehan’i Kristy maharitra. Ny fahelan’ny fotoana dia tsy nanova na inona na inona ny amin’ny teny fikasana farany nataony. Azo antoka fa eto amintsika Izy ankehitriny, tahaka ny niarahany tamin’ny mpianatra fahizay, ary mbola homba antsika Izy "ambara-pahatongan’ny fahataperan ’izao tontolo izao. ”(...)
Hitany ireo olony mahatoky; mifandray amin’izy ireo Izy, mampahery sy manatanjaka azy. Ary irahin’Andriamanitra ireo anjeliny mahery indrindra, hanompo ny olombelona miasa ho Azy, mitory ny fahamarinana amin’izay tsy mbola mahalala. – TFC, b.8, t. 17.