"Ary hoentiko miditra amin'ny afo ny ampahatelony, ary harendrika toy ny fandrendrika volafotsy izy, ary hizahako toetra toy ny fizaha toetra ny volamena izy; hiantso ny anarako izy, ary Izaho hamaly azy; Izaho hanao hoe: Oloko izy ary izy hanao hoe: Jehovah no Andriamanitro."- Zak. 13:9
Mofon’aina:
Mizaha toetra ny herin'ireo zanany Andriamanitra amin' ny alalan'ny fitsapana. Matanjaka tsara ve ny fo? Tsy meloka ve ny fieritreretana? Miara-manambara amin'ny fanahintsika ve ny Fanahy fa zanak'Andriamanitra isika? Tian'Andriamanitra ho azo antoka amin'ny alalan'ny fizahan-toetra avokoa ny amin'izany. Dioviny ho afaka amin'ny tain-drendrika rehetra isika ao amin'ny memin'ny fahoriana. Tsy fitiavana hampahory antsika tsy akory no antony amelany antsika hiharan'ny fitsapana fa mba hisarihana ny fijerintsika ho Aminy, sy hanamafisana orina ny fifaharantsika, ary hampianarana antsika fa raha tsy mikomy isika fa matoky Azy dia hahita ny famonjeny. (...)
Mahery sady mamy ny fitiavan'i Kristy ny zanany. Fitiavana mahery noho ny fahafatesana izany satria nafoiny ho antsika ny ainy. Fitiavana mahatoky mihoatra noho ny fitiavan'ny reny ny zanany izany. Mety miova ny fitiavan'ny vehivavy ny zanany, fa ny Fitiavan' i Kristy kosa tsy miova. (...)
Omena fampiononana lehibe isika amin'ny fitsapana tsirairay. Tsy tohina ve ny fon'ny Mpamonjy manoloana ny fahalementsika? Tsy efa nalaim-panahy tamin'ny zavatra rehetra tahaka antsika ve Izy? Tsy efa nanasa antsika ve Izy hametraka Aminy ny olana sy ny fanahiantsika rehetra? Koa aoka isika tsy ho kivy ny amin'ny enta-mavesatry ny ampitso. Andeha hozakaintsika amin-kerim-po sy fifaliana ny enta-mavesatry ny anio. Anio isika no mila matoky sy mino, tsy nomena antsika ny hiaina ankoatra ny ankehitriny. Ilay manome hery hiatrehana ny anio no hanome hery hiatrehana ny ampitso. (…)
Tsy misy mandratra ny fanahy toy ny antsy maranitry ny fisalasalana sy ny tsy finoana. Rehefa tonga ny fitsapana, satria tsy maintsy ho avy izany, dia aza manahy na mimonomonona. Ny fanginan'ny fanahy no andrenesana mazava kokoa ny feon'Andriamanitra (Sal. 37:7). (...) Mitondra anao ho amin'ny fanandramana mahafinaritra Izy.- RH, 20 Jona 1907.
mofon'ana