"(...) Izay, na dia nanana ny endrik 'Andriamanitra aza, dia tsy nataony ho zavatra hofikiriny mafy ny fitoviana amin'Andriamanitra." - Fil. 2:6.
Mofon'Aina:
Tsy nataon'i Jesôsy Kristy "ho zavatra hofikiriny mafy ny fitoviana amin'Andriamanitra." Koa satria ny maha-Andriamanitra irery no mahomby amin'ny famerenana ny olombelona amin'ny laoniny taorian'ny kaikitra misy poizin'ny menarana, dia nandray ny toetry ny olombelona Andriamanitra tao amin'ny Zanany lahitokana. Ary tao amin'ny fahalemen'ny maha-olona no nihazonany ny toetran'Andriamanitra, ka niarovany ny Lalany masina tamin'ny fomba rehetra sy nandraisany ny famaizan'ny fahatezerana sy ny fahafatesana noho ny amin'ny zanak' olombelona. Fiheverana manao ahoana re izany! Ilay nanana firaisana tamin'ny Ray talohan'ny nahariana izao tontolo izao no mangoraka ity tontolo very sy simban'ny fandikan-dalana ity, ka nanolotra ny Ainy ho avotra hisolo azy. Izy ilay famirapiratan'ny voninahitr'Andriamanitra, ilay sary maneho Azy, no nitondra ny fahotantsika tao amin'ny Tenany teo amin'ny hazo, niaritra ny famaizana noho ny fandikan'ny olombelona lalana mandra-pahatonga ny rariny ho afa-po ka tsy nitaky zavatra hafa intsony. Endrey ny halehiben'ny fanavotana natao ho antsika! Lehibe loatra izany ka niatrika ny fahafatesana lozabe indrindra teo amin'ny hazo fijaliana Ilay Zanak'Andriamanitra mba hitondra fiainana sy tsy fahafatesana ho antsika amin'ny alalan'ny finoana Azy.
Tsy mety ho takatry ny olombelona ny maha-mpandala ny rariny an'Andriamanitra kanefa Izy mpanamarina ny mpanota. Mihamidadasika sy mihalalina izany ka tsy mety ho takatry ny fisainantsika arakaraka ny iezahantsika hanakatra azy. Rehefa mijery ny hazo fijalian'i Kalvary amin'ny mason'ny finoana isika, ary mahita ny fahotantsika eo amin'Ilay mihantona eo (...), rehefa takatsika fa Andriamanitra no eo, Ilay Ray mandrakizay, Ilay Andrianan'ny fiadanana, dia voatarika isika hihiaka hoe: "Endrey! manao ahoana ny fitiavana nasehon'ny Ray ho antsika" - 1 Jao. 3:1.
Rehefa hain'ny olombelona ny mamatra ny toetra ambonin'ilay Andriamanitra Tompon'ny maro sy ny manavaka ny maha-Andriamanitra mandrakizay Azy amin'ny maha-olona voafetra, izay vao ho fantany ny halehiben'ny sorona nataon'ny Lanitra mba hampiarenana ny taranak'olombelona hiala eo amin'izay nahalavoany (...) ho tonga ankohonan'Andriamanitra. (...) Ny maha-Andriamanitra an'i Kristy no antoka ho an' ny fiainana mandrakizay. (...) Izy, ilay Mpitondra ny fahotan'izao tontolo izao, no hany mpanelanelana mba hampihavanana antsika amin'ilay Andriamanitra masina. - TMK, t. 35.