"Iza no Andriamanitra tahaka Anao, Izay mamela heloka sady mandalo ny fahadisoan'ny sisa amin'ny lovany? Tsy mitana ny fahatezerany ho mandrakizay Izy, fa tia famindrampo." - Mika 7:18.
Mofon'Aina:
Faly aho fa tsy ny fihetseham-pontsika no porofo maneho fa zanak'Andriamanitra isika. Haka fanahy anao ilay fahavalo ka hanao izay hiheveranao fa nanao zavatra nampisaraka anao amin'Andriamanitra ianao ka tsy tia anao intsony Izy, kanefa ilay Tompontsika dia mbola tia antsika hatrany. (...)
Aza mijery ny tenanao fa banjino i Kristy ilay tonga lafatra. Tsy mahay manamboatra fahamarinana ho an'ny tenantsika isika. Eo an-tanan'i Kristy ny akanjom-pahamarinana mangatsakatsaka ary hotafiny antsika izany. Hanao teny mamy mitory famelan-keloka sy teny fikasana Izy. Entiny eo amin'ny loharano velona ny fanahintsika mangetaheta (...). Miantso antsika Izy mba hitondra eo Aminy ny enta-mavesatra, ny alahelontsika rehetra, ary nolazainy fa hahita fitsaharana isika. (...)
Hitan'i Jesôsy ireo heloka vitantsika tamin'ny lasa, ary avelany; tsy tokony hanala baraka Azy amin'ny fisalasalana momba ny fitiavany isika. Aoka hapetraka eo an-tongotry ny hazo fijalian'i Kalvary ny fahatsapana ho meloka. Manapoizina ireo loharanon'ny fiainana sy ny tena fifaliana ny fahatsapana ho be fahotana. Hoy i Jesôsy: "Apetraho eto Amiko avokoa izany. Hesoriko ireo fahotanao; ary homeko fiadanana ianao. Aoka tsy hisy intsony ny fanaovanao tsinontsinona ny tenanao, satria ny rako mihitsy no efa nividianako anao. Ahy ianao. Hohatanjahiko ny sitraponao marefo; hofafako ny neninao noho ny fahotana." Rehefa izay dia atodiho Aminy ny fonao feno fankasitrahana sy mangovitry ny fisalasalana ka fikiro ny fanantenana apetrany eo anoloanao. Raisin'Andriamanitra ny fonao vaky sy torotoro ary omeny anao maimaimpoana ny famelan-keloka. Maniry ny handray anao ho isan'ny ankohonany Izy, ary omeny ny fahasoavany mba hanampy anao amin'ny fahalemenao; hotarihin' ilay Mpamonjy malala isaky ny indray mandingana ianao raha mihazona ny Tanany ary mamela Azy hitari-dalana anao.
Katsaho ny teny fikasana sarobidy avy amin'Andriamanitra. Raha mampihorohoro ny sainao i Satana dia manalavira ireny fampihorohoroana ireny ka fikiro ny teny fikasana ary aoka ny fanahinao hahazo hery amin'ny famirapiratan'izany (...). - TMK, t. 241.