"Miandrasa an'i Jehôvah hianao; matokia, ary aoka hahery ny fonao; eny, miandrasa an'i Jehôvah ."- Sal. 27:14.
Mofon'Aina:
Tsy nisy fiainana tototra asa sy novesarana andraikitra tahaka ny an' i Jesôsy, kanefa matetika tokoa ny nivavahany! Nitohy mandrakariva ny firaisany tamin'Andriamanitra! (...) Tahaka ny anankiray amintsika Izy, mahalala izay ilaintsika sy ny fahalementsika, ary niankina tanteraka tamin'Andriamanitra ka tany amin'ny toeram-pivavahana mangina no nitadiavany hery avy any an-danitra mba hahafahany mandroso hiatrika ny adidy sy ny fitsapana. Niatrika tolona maro sy fangirifirian'ny fanahy teto amin'ity tontolo feno ota ity i Jesôsy. Tamin'ny firaisana amin'Andriamanitra no nahamaivana ireo fahoriana nitambaby taminy. (...)
(...) Tamin'ny maha-olona Azy no nitalahoany ny seza fiandrianan'Andriamanitra mandra-pahazoan'ny taranak'olombelona ny rivotry ny lanitra izay tokony hampiray ny olombelona amin'Andriamanitra. Tamin'ny alalan'ny firaisana nitohy no nandraisany fiainana avy tamin' Andriamanitra, mba hanomezany fiainana an'izao tontolo izao. Tiany hiainantsika ny fanandramana niainany. "Avia hianareo hitokana" - Mar. 6:31, izany no baikony amintsika. Hatanjaka kokoa isika ary ho azo ampiasaina bebe kokoa raha toa manaraka ny Teniny. ( ... )
Raha hanokana fotoana hankanesana eo amin'i Jesôsy isika anio mba hilaza Aminy izay ilaintsika dia tsy ho diso fanantenana; ho eo ankavanantsika tokoa Izy mba hanampy antsika. (...)
Ireo izay hofanin'Andriamanitra dia tokony hanana fiainana tsy mifanaraka amin'izao tontolo izao sy ny fombafombany na ny fanaony; ary tokony hanana fanandramana manokana ny tsirairay mikasika ny fahafantarana ny sitrapon'Andriamanitra. (...) Rehefa ampanginina ny feo hafa rehetra ary mankeo anatrehany amin'ny fanginana isika, dia ho rentsika kokoa ny feon'Andriamanitra (...). Hoy Izy: "Mitsahara, ka aoka ho fantatrareo fa Izaho no Andriamanitra" - Sal. 46:10. Eo irery ihany no misy ny tena fitsaharana. Ary izany no fiomanana mahomby ho an'izay rehetra miasa ho an'Andriamanitra. Eo anivon'ny vahoaka maro mihazakazaka sy ny fahasahiranana noho ny asa mafy eo amin'ny fiainana, ny fanahy izay mahazo famelombelomana tahaka izany dia ho voahodidin'ny rivo-piainana feno fahazavana sy fiadanana. Fofo-manitra no hameno ny fiainany ary ho hita eo amin' izany ny herin'Andriamanitra izay hahakasika ny fon'ny hafa. - TMK, t. 259.