"Kanefa samy manana izay fanomezam-pahasoavana nomen'Andriamanitra azy avy, ka ny anankiray toy izao ary ny anankiray toy izao kosa." - 1 Kôr. 7:7.
Mofon'Aina:
Mihoatra noho ny vola no omen'Andriamanitra ireo mpitantam-pananany. Fanomezam-pahasoavana ny fahaiza-mizara anananao. Inona no asehonao mikasika ireo fanomezam-pahasoavana avy amin'Andriamanitra, eo amin'ny teninao ary eo amin'ny firaisam-po feno halemem-panahy? (...) Talenta ny fahalalana ny fahamarinana. Fanahy maro ao anatin'ny haizina no mety hohazavain'ny teny feno fahamarinana sy fahatokiana ataonao. Fon'olona maro no mangetaheta firaisam-po sy efa ho faty lavitra an'Andriamanitra. Mety hanampy azy ireo ny fangorahanao. Ilain'ny Tompo ny teninao izay ampitenenan'ny Fanahiny Masina. (...)
Ny asa voalohany indrindra tokony hataon'ny Kristianina dia ny mandinika ny Soratra amim-bavaka mafana, mba hananan'izy ireo finoana miasa amin'ny fitiavana sy manadio ny fanahy amin'ny asam-pitiavan-tena rehetra. Raha raisina ao am-po ny fahamarinana dia miasa tahaka ny lalivay tsara, mandra-pahatonga ny hery rehetra hilefitra eo ambany sitrapon'Andriamanitra. Amin'izay dia tsy maintsy hamirapiratra tahaka ny masoandro ianao. (...)
Tokony hohamasinina tahaka ny fanomezana sarobidy ny fanomezana avy amin'Andriamanitra rehetra. Tokony hatokana ho an'Andriamanitra ireny, mba hiasa ho an'ilay Tompo. Talenta ny tombontsoa ara-tsosialy rehetra. Tsy natao hanaovana izay mahafinaritra ny tena na ho fialam-boly sy ho fahafinaretana izany. (...) Zava-manan-danja tokoa ny fanomezam-pahasoavan'ny fanehoana modely tsara. (...)
Mampita fahalalana an'i Kristy ny fanomezam-pahasoavan'ny fitenenana, ny fahalalana ary ny fangorahana sy ny fitiavana. Aoka ireo fanomezam-pahasoavana ireo hatokana ho an'Andriamanitra. Ilain'ny Tompo ireo, ary manao antso ny amin'ny hampiasana izany Izy. Tokony handray anjara ny rehetra amin'ny fanomanana ny fanahiny ary koa amin'ny fanomanana ny hafa mba hanolotra ny talentany ho an'Andriamanitra. Aoka ho vonona hampiasaina ho an'Andriamanitra ny fanahy sy ny fanomezam-pahasoavana tsirairay. Tokony hiara-miasa amin'Andriamanitra amin'ny asa famonjem-panahy ny rehetra.
Omen'Andriamanitra anao ny talenta mba hahatonga anao ho mpiara-miasa mahomby amin'i Kristy. Fon'olona maro no mangetaheta firaisam-po, ary mila fatratra ny fanampiana sy ny fanohanana izay nomen'Andriamanitra anao mba homena azy ireo. - TMK, t. 327.