"Fa Andriamanitra tsy naniraka ny Zanaka ho amin'izao tontolo izao hanameloka izao tontolo izao, fa mba hamonjeny izao tontolo izao." — Jao. 3:17.
Mofon'aina:
Misy ireo fanahy izay mangovitra ao anatin'ny fisalasalana, mametra-panontaniana hoe: "Ahoana no ahafantarako fa vita fihavanana amin'Andriamanitra marina aho? Ahoana no ahazoako antoka fa tena tia ahy sy namela ny heloko marina Izy?" Tsy anjaranao ry zandry malala ny manao izay hahamarina anao eo anatrehan'Andriamanitra. Manasa anao i Jesôsy hanatona Azy miaraka amin'izao enta-mavesatrao sy olonao rehetra izao (...) Raiso ny teny fikasana sy ny fanampiana efa nomen'Andriamanitra (...) Aza mijery ny tenanao fa jereo i Jesôsy; ao amin'i Kristy mantsy no isehoan'ny toetran'ny Ray.
Ny ran'i Kristy mahavonjy no hany fanantenantsika; amin'ny alalan'ny fahamendrehany irery ihany mantsy no ahazoantsika famelan-keloka sy fiadanana.
Mitombo ny finoantsika sy ny fitiavantsika satria raha ny fahitana ny toetran'Andriamanitra ao amin'i Kristy dia manana Ray be famindrampo sy feno antra isika (...)
Tokony ho voakasiky ny herin'i Kristy mitondra fiainana ny hevitrao sy ny fisainanao, mba hisy fahatsarana sy fahamarinana mitoetra ao. Misy fahamarinana lehibe sy sarobidy ilainao banjinina mba hahamafy orina ny finoanao sy hanananao fahalalana marina an'Andriamanitra. Ô raha mba fantatr'ireo izay feno tsy firaihana sy tsy mifototra tsara amin'ny fikatsahana ny fahamarinana mantsy, fa na toy inona na toy inona fahendren'izao tontolo izao dia tsy mahalala an'Andriamanitra izy.
Tsara ny mianatra araka izay azo atao ny zavatra rehetra avy amin'ny zavaboary, saingy aoka tsy hohadinoina ny mitodika any amin'i Kristy avy eo mba hahafantarantsika amin'ny fahafenoany ny toetran'Ilay Andriamanitra velona. Hitombo amin'ny fahalalana ny toetrany ianao amin'ny fibanjinanao an'i Kristy sy ny fiezahanao hanahaka Azy, ka hanjary ambony sy madio ary mendrika ny sainao sy ny fonao. Aoka ny tanora hikendry avo, tsy hiankina amin'ny fahendren'olombelona (...)
Hitoby manodidina izay miantehitra mandrakariva amin'Andriamanitra ka matoky sy mivavaka Aminy amin'ny fo tsotra ny anjelin'ny lanitra (...)
Izay miaina amim-pinoana an'i Kristy dia hahazo hery sy hasandratra, ho afaka hiady ny ady tsaran'ny finoana, ary hahazo ny fiainana mandrakizay. — HP, t. 16.