"Jehovah Tompo nanome Ahy ny lelan'ny efa mahay, mba hahaizako manao teny hampahatanjaka izay reraka; ampandrenesiny isa-maraina isa-maraina, . eny, ampandrenesiny ny sofiko hihaino tahaka ny efa mahay. " - Isa. 50:4.
Mofon'aina:
Diniho i Kristy sy ny fiainany teto an-tany; tokony ho toa Azy ny Kristianina tsirairay. Izy no Ohatra ho antsika, tsy noho ny amin'ny fahadiovany tsy misy pentina ihany, fa noho ny amin'ny faharetany, ny fahatsaram-panahiny, ny toe-tsainy miabo. Mafy orina toy ny vatolampy Izy rehefa ny fahamarinana sy ny adidy no resahina, kanefa be fitiavana sy feno fanajana hatrany Izy. (...) Rivo-piainana madio no nentin'ny fanatrehany tao an-tokantrano, ary ny fiainany dia toy ny masirasira miasa amin'ireo singa ao amin'ny fiarahamonina. Feno fitiavana sy tsy nanan-tsiny Izy raha nandeha teo anivon'ireo olona tsy miraika, ratsy fanahy, tsy manaja, ireo mpamory hetra tsy marina, ireo Samaritana tsy hendry, ireo miaramila mpanompo sampy, ireo tantsaha henjan-toetra, sy ireo olona maro hafa.
Nanao teny mamy tetsy sy teroa Izy raha nahita ireo olona trotraka sy noterena hitondra enta-mavesatra. Nanampy nitondra ny entan'ireo Izy ary namerimberina taminy ireo lesona voarainy tamin'ny alalan'ny zavaboary, ny amin'ny fitiavana, ny fahamoram-panahy, ary ny fahatsaran'Andriamanitra. Nanao izay hanomezana fanantenana an' ireo izay mafy fo sy mahantra Izy, ka nitondra toky ho azy ireo fa mety ho tonga tsy manan-tsiny sy malemy fanahy izy ireo, dia hanana toetra toy ny an'ny zanak' Andriamanitra (...). Niara-nisakafo tamin'ny mpamory hetra toy ny vahiny manan-kaja Izy; nasehony tamin'ny fangorahana sy ny fitiava-namana fa fantany tsara ny tombam-bidin'ny maha-olona, ary naniry fatratra ny ho mendrika ny fitokiany ny olona. Nitondra hery feno aina sy fitahiana ho an'ny fanahin'ireo noana ny Teniny. Nisy ainga vao tao amin'izy ireo, ary hitan'ireto olona nailikiliky ny fiarahamonina ireto fa mbola azo atao ny manantena fiainam-baovao.
Manalefaka izay rehetra henjana sy miridiridy ao amin'ny toetra ny fivavahan'i Jesôsy, ary manalama izay rehetra mikitoantoana sy maranidranitra amin'ny fomba amam-pihetsika. (...) Ny Kristianina malemy fanahy sy feno fanajana no fitaovana mahery vaika sy mahomby indrindra ho fampandrosoana ny filazantsara. — HP, t. 181.