"Fa tahaka izany, ny Zanak'olona tsy tonga mba hotompoina, fa mba hanompo ka hanolotra ny ainy ho avotra hisolo ny maro." — Mat. 20:28.
Mofon’aina:
Tsy natao hivelona ho an'ny tenantsika isika. Velona ho _ an'ny hafa i Kristy fony Izy teto amin'izao tontolo izao — tsy tonga hotompoina Izy fa hanompo. Raha miezaka miaina eto an-tany tahaka ny niainan'i Jesôsy ianao dia milaza amin'izao tontolo izao hoe: "Banjino Ilay Lehilahin' i Kalvary." Mitarika ny hafa ho eo amin'ny lalan'ny fahamarinana ianao amin'ny alalan'ny foto-kevitra sy ny ohatra asehonao.
Ny fahotana kolokoloina indrindra, izay mampisaraka antsika amin' Andriamanitra sy mahatonga areti-mifindra ara-panahy maro, dia ny fitiavan-tena. Tsy misy fomba hitodihana amin'Andriamanitra afa-tsy amin'ny alalan'ny fandavan-tena. Tsy mahavita na inona na inona isika raha amin'ny herin'ny tenantsika; fa afaka ny ho velona mba hanao soa ho an'ny hafa kosa amin'ny alalan'Andriamanitra izay mampahery antsika, ka ho afa-miala amin'ny haratsian'ny fitiavan-tena. Tsy mila mankany amin'ny tanin'ny mpanompo sampy isika mba hanehoana amin'Andriamanitra ny fanoloran-tenantsika hanana fiainana manampy ny hafa sy tsy tia tena. Ao an-tokantrano, ao am-piangonana, ary ireo namana sy ny mpiara-miasa amintsika no tokony hanaovantsika izany. (...)
"Maty isan'andro aho", hoy i Paoly — 1 Kôr. 15:31. Ny fahafatesan'ny "izaho" isan'andro eo amin'ny raharaha madinika atao eo amin'ny fiainana no mahatonga antsika ho mpandresy. (...)
Mibaiko mazava ny mpanara-dia Azy rehetra Andriamanitra mba hanao soa amin'ny hafa amin'ny alalan'ny hery miasa mangina ananany sy ny fahafaha-manaony. (...) Ahazoana fahafaham-po sy fiadanana mamy ao am-po ny fiasana ho an'ny hafa, ary valisoa ampy tokoa izany. (...) Tsy eto an-tany ihany io valisoa io fa mihoatra noho izany; voamariky ny anjely sy mamirapiratra ao anatin'ny bokin'ny fiainana mantsy ny adidy tsirairay atao amim-pahatokiana sy tsy amim-pitiavan-tena. Tsy hisy olona hihevitra ny tombontsoan'ny tenany na hitady izay mahafinaritra azy fotsiny any an-danitra. Ny hahasambatra ireo mponin'ny lanitra manodidina azy no hokatsahiny. Raha tiantsika ny hiara-paly amin'ireo mponin'ny lanitra ireo any amin'ny tany vaovao, dia ny fitsipiky ny lanitra no tsy maintsy mifehy antsika dieny ety. - HP, t. 233.