"Tahaka ny nanirahanao Ahy ho amin'izao tontolo izao no mba nanirahako azy kosa ho amin 'izao tontolo izao." - Jao. 17:18.
Mofon'aina:
Moa ve mahatonga antsika tsy ho afaka manao ny asa nanirahan'ny Tompo antsika ny fisarahantsika amin'izao tontolo izao noho ny fitandremantsika ny didin'Andriamanitra? Manakana antsika tsy hanao ny tsara amin'ny manodidina antsika ve izany? Tsia, arakaraka ny ifikirantsika amin'ny lanitra no vao mainka hahombiazantsika amin'ny asa. Aoka isika handinika Ilay Môdely mba ho ao anatintsika koa ny toe-tsaina izay tao amin'i Kristy. Tsy mba isan'ireo olo-malaza sy nomem-boninahitra teto amin' izao tontolo izao i Kristy. Tsy mba niaraka tamin'ireo nitady harena sy fahafinaretana Izy. Niasa ho fanampiana ny sahirana Izy, namonjy ireo very sy efa ho faty, nampiarina ireo nitanondrika, namaha ny fatoram-pahorian'ireo nandevozina, nampahery ireo mijaly, ary nanao teny feno fangorahana sy fampiononana ho an' ireo fadiranovana sy malahelo. Natao hanaraka izany ohatra izany isika. Arakaraka ny hananantsika ny toe-tsain'i Kristy no hitadiavantsika hanao soa ho an'ny mpiara-belona amintsika. (...)
Efa hikatona ny varavaram-pahasoavana (...). Tsy ho ela intsony dia ho voatonona ny vavaka farany ho an'ny mpanota, hilatsaka ny ranomaso farany, homena ny fampitandremana farany, hatao ny fitalahoana farany, ary tsy ho re intsony ilay feo mamin'ny famindrampo. Izany no mahatonga an'i Satana manao ny ezaka lehibe indrindra mba hihazonana ny lehilahy sy ny vehivavy ao amin'ny fandriny (...). Ataon'i Satana izay hanesorana amintsika izay rehetra mety ho ara-panahy, ka ny fahasoavan'i Kristy ao am-pontsika dia soloany toetra ara-nofo fankahalana, eritreri-dratsy, fialonana, fitiavana an' izao tontolo izao (...). Mila hery hiatrehana ilay fahavalo isika, (...)
Raha tsy miambina sy mivavaka mantsy isika dia hiditra hameno ny fontsika sy handroaka ny tsara rehetra ao am-pontsika ireo zava-dratsy ireo. Tena lehibe ny andraikitra mipetraka amin'ireo mpianatr'i Kristy. Tsy maintsy entina ho eo amin'izao tontolo izao rakotra haizina ny fahazavana avy any an-danitra. Arakaraky ny halehiben'ny haizina no tsy maintsy hamirapiratan'ny fahazavan'ny finoana sy ny oha-piainana kristianina. — HP, t. 312.