« Fa efa nifidy azy Aho mba handidy ny zanany sy ny taranany mandimby azy hitandreman’ireo ny lalàn’i Jehovah hanao izay marina sy mahitsy, mba hitondran’i Jehovah amin’i Abrahama izay efa nolazainy taminy. » Gen. 18:19.
Mofon’aina:
Eo imason’Andriamanitra, ny maha-izy ny olona dia araka izay maha-izy azy eo anivon’ny fianakaviany. Nampisongadina ny fiainan’i Abrahama, ilay sakaizan’Andriamanitra, ny fanajana fatratra ny tenin’Andriamanitra. Nokolokoloiny ny fivavahana tao an-tokantranony. Nanjaka tao an-tokantranony ny fahatahorana an’Andriamanitra. Izy no mpisorona tao an-tokantranony. Noraisiny ho adidy masina ny ankohonany. Mihoatra ny arivo ny fanahy teo ambanin’ny fiadidiany, ary nampitodihiny tamin’Ilay Andriamanitra Mpanjakan’ny zava-drehetra izy ireo tsirairay avy, na ray aman-dreny na zanaka. Tsy naneritery ny zanany izy, ary nankatô azy ny zanany. Fitiavana sy fahamarinana no nentiny nanapaka ny ankohonany tamin’ny fahatahorana an’Andriamanitra, ary nankasitrahan’Andriamanitra ny fahatokiany.
“Nanapaka tsara ny ankohonany izy.” Tsy nanao an-tsirambina ny fanitsiana ny fironan-dratsin’ny zanany izy fa fahotana izany, tsy nanao fiangarana noho ny fahalemeny na noho ny tsi-fahendreny izy, tsy nampandefitra ny adidy tokony hataony noho izay fiheveran-diso hoe fanehoam-pitiavana. (...)
Vitsy ankehitriny ireo manahaka izany ohatra izany. Maro ireo ray aman-dreny mandeha an-jambany fotsinv araka ny fihetseham-pony, ka mamela ny sitrapon’ny zanany hofehezin'ny fisainany tsy mbola àry sy ny fironany tsy mbola voafehiny. Izany no fanimbana ratsy indrindra atao amin’ny tanora sy fahadisoana lehibe indrindra atao amin’izao tontolo izao. Mahatonga fikorontanana eo amin’ny fianakaviana sy ny fiaraha-monina ny fitazanam-potsiny ataon’ny ray aman-dreny. Izany no mahatonga ny tanora hiorim-paka ao amin’ny fanaranam-po amin’ny filany fa tsy milefitra amin’ny fitakian’Andriamanitra.
Samy an’Andriamanitra. ny ray aman-dreny sy ny zanaka ka tokony ho eo ambanin’ny fanapahany. Tamin’ny fanehoam-pitiavana sy fahefana miaraka no nanapahan’i Abrahama ny ankohonany. Manome tari-dàlana ho antsika ny Tenin’Andriamanitra. Izany fitsipika izany no fenitra tsy azontsika ihodivirana raha tiantsika ny hanatanteraka ny sitrapon’Andriamanitra. Ny sitrapon’Andriamanitra no tokony hampanjakaina. Ny fanontaniana tokony hapetratsika dia tsy hoe inona no nataon’ny hafa? Inona no hoheverin’ireo havako? Na ny hoe inona no holazain’izy ireo raha manohy ity safidy ity aho? Fa ny hoe inona no nambaran’Andriamanitra? Tsy hahita fahombiazana amin’inona na inona na ny ray aman-dreny na ny zanaka raha tsy mandeha araka ny fomban’Andriamanitra irery ihany. – CC, t. 49.