« Ary hoy Jehôvah tamin’i Gideôna: Maro loatra ny vahoaka eo aminao, ka tsy hanolotra ny Midiana eo an-tànany Aho, fandrao hirehareha amiko ny Isiraely ka hanao hoe: Ny tanako ihany no namonjy ahy. »Mpits. 7:2.
Mofon’aina:
Natao lalàna teo amin’ny lsiraely fa mialoha ny hirotsahan’izy ireo an’ady dia tokony hatao amin’ny tafika izao fanambarana izao: “Iza no olona izay efa nanao trano vaovao, nefa tsy mbola notokanany? Aoka handeha hiverina any an-tranony izy, fandrao maty any am in’ny ady, ka olon-kafa no hitokana ny tranony. Ary iza no olona efa nanao tanim-boaloboka nefa tsy mbola nihinana ny vokatra? Aoka handeha hiverina any an-tranony izy, fandrao maty any amin’ny ady, ka olon-kafa no hihinana ny vokatra. Ary iza no olona (...).” Ary mbola hiteny amin’ny olona ihany ny mpifehy azy ka hanao hoe: “Iza no olona izay matahotra ka osa fo? Aoka handeha hiverina any an-tranony izy, fandrao ho ketraka tahaka ny fony koa ny fon ’ny rahalahiny” – Deo. 20:5-8.
Satria vitsy monja izy ireo raha mitaha amin’ny isan’ny fahavalo, dia tsy nataon’i Gideôna ilay fanambarana mahazatra. Gaga dia gaga izy raha nilazana avy eo fa lehibe loatra ny tafiny. Ny Tompo anefa dia nahita ny avonavona sy ny tsy finoana nisy tao am-pon’ny vahoakany. Taitra izy ireo noho ny antso mampihetsi-po nataon’i Gideôna ka dia samy nirotsaka tao amin’ny tafika avy hatrany; kanefa maro tamin’izy ireo no feno tahotra rehefa nahita ny habetsaky ny Midianina. Raha handresy eo aza anefa ny lsiraely, dia ireo indrindra no haka ny voninahitra ho an’ny tenany ka tsy mba hanaiky fa an’Andriamanitra ny fandresena.
Nankatò ny toro-lalana avy amin’ny Tompo i Gideôna, ary tamin’ny alahelo lehibe no nahitany roa arivo lahy, izany hoe mihoatra ny roa tokony amin’ny tafiny, niverina nody any an-tranony avy.
Te hanao zavatra lehibe ho antsika ny Tompo. Tsy ny hamaroantsika no hahazoantsika ny fandresena, fa amin’ny alalan’ny fanolorantsika ny fanahintsika ho an’i Jesôsy. Tokony handroso amin’ny heriny isika, sady mitoky amin’Ilay Andriamanitr’Isiraely mahefa ny zavatra rehetra. Misy lesona ho antsika ao amin’ny tantaran’ny tafik’i Gideôna (...) Ankehitriny, irin’Andriamanitra koa ny hiasa amin’ny alalan’ny ezaky ny olombelona, ary ny hanatanteraka zavatra lehibe amin’ny alalan’ny fitaovana marefo. – CC, t. 127.