"Indro, feno avonavona ny fanahin'ireny, fa tsy mahitsy ao anatiny, fa ny marina ho velon'ny finoany." - Hab. 2:4.
Mofon’aina:
Tamin'ny fotoana nanjakan'i Josia sy taona maro talohan'izao dia nieritreritra ireo olona nahatoky tao amin'ny Joda raha ho tanteraka ihany ireo teny fikasan'Andriamanitra nataony tamin'ny Isiraely fahizay (...)
I Habakoka no nilaza ireo fanontaniana feno tebiteby ireo raha nahita ny finoan'ireo olona tamin'ny androny ka namoaka izay mavesatra tao am-pony hoe: "Jehôvah ô indrisy ny hahelan'ny efa nitarainako, nefa tsy nohenoinao!" – Hab. 1:2 (...) Ny finoany izay nihoatra ny azo heverina ny amin'ny ho avy dia nifikitra mandrakariva tamin'ireo teny fikasana sarobidy momba ny fitiavan'Andriamanitra ireo Zanany mahatoky, ka nanao hoe: "tsy ho ringana isika". Niaraka tamin' ity fanambarana amim-pinoana ity no nametrahany ny toe-java-nisy teo aminy sy ireo vahoaka mino tao Isiraely teo am-pelatanan'Andriamanitra mpamindra fo (...)
Ny finoana izay nanatanjaka an'i Habakoka sy ireo masina sy marina tamin'izany fotoan'ny fisedrana mahamay izany no finoana izay mitahiry koa ny vahoakan'Andriamanitra ankehitriny. Ao anatin'ny ora maizina, eo ambany toe-javatra mangidy, dia afaka mitahiry ny fanahiny hitoetra eo amin'ilay loharanon'ny fahazavana sy ny hery rehetra ireo Kristianina mino an'Andriamanitra. Isan'andro amin'ny alalan'ny finoana dia havaozina hatrany ny fanantenany sy ny herim-pony, "fa ny marina amin’ny finoana no ho velona." – Hab. 2:4b (...)
Tsy maintsy mankasitraka sy mikolokolo ny finoana izay niainan'ireo mpaminany sy Apôstôly isika, finoana miorina amin'ny teny fikasan'Andriamanitra ary miandry ny fanafahana araka ny fotoanany sy ny fombany. Ireo teny azo antoky ny faminaniana dia hihaona amin'ny fahatanterahana farany rehefa ho avy am-boninahitra ny Tompo Jesôsy Mpamonjy antsika, ilay Mpanjakan'ny mpanjaka sy Tompon'ny tompo (...) Toy ny tamin'ny alalan'ny mpaminany izay niezaka nampahery an'i Joda tao amin'ny fotoanan'ny fihemorana tsy nisy toa azy, dia aoka isika hilaza amim-pahatokiana hoe: "Jehôvah dia ao amin’ny tempoliny masina; mangina eo anatrehany, ry tany rehetra." – Hab. 2:20. Aoka isika hitoetra eo amin'ny fahatsiarovana ilay hafatra mamintsika manao hoe: "Fa ny fahitana dia mhola ho amin'ny fotoan'andro, ary mikendry ny farany izy ka tsy ho diso; Eny, na dia mitaredretra aza izy, andraso ihany, fa ho avy tokoa izy ka tsy hijanona."- Hab. 2:3 – CC, t. 242.