Vakio ny Sal. 51:1-5. Nahoana ny mpanao Salamo no mitady ny famindram-pon'Andriamanitra?
Nandoatra ny fony teo anatrehan'Andriamanitra i Davida mpanjaka ka nangataka ny hamelana ny helony raha tao anatin'ny fotoana nanjombona indrindra ara-panahy teo amin'ny fiainany izy (2 Sam. 12). Ny famelan-keloka dia fanomezana manokana atolotr'Andriamanitra noho ny fahasoavany, noho ny haben'ny fiantrany (Sal. 51:1). Miantso an'Andriamanitra mba tsy hijery azy araka izay valiny sahaza ny fahotany i Davida (Sal. 103:10) fa araka ny toetra maha-Andriamanitra Azy, dia ny famindram-po sy ny fahatokiana ary ny fiantrana (Sal. 51:1; Eks. 34:6,7).
Vakio ny Sal. 51:6-19. Ahoana ny sary anehoana ny famelan-keloka eto? Inona ny tanjon'ny famelan' Andriamanitra heloka?
Mihoatra noho ny fanambarana ara-dalàna ny tsy fananan-keloka ny famelan- keloka avy amin'Andriamanitra. Miteraka fiovana lalina izay mahatratra ny atifon'ny olombelona mihitsy izany (Sal. 51:6; Heb. 4:12). Miteraka famoronam- baovao izany (Sal. 51:10; Jao. 3:3-8). Ny matoanteny hebreo bara', izay adika hoe "foronina", dia maneho ny hery hoenti-mamorona ananan'Andriamanitra (Gen. 1:1). Andriamanitra irery no afaka bara'; Izy irery no mahay manao fanovana ifotony sy maharitra ao amin'ny fon'ny olona iray mibebaka (2 Kor. 4:6).
Mangataka ny hodiovina amin'ny hysopa i Davida (Lev. 14:2-8; Sal. 51:7). Tsapany fa mampanalavitra azy amin'ny fanatrehan'Andriamanitra ny helony, tahaka ny boka izay voaroaka tsy ho ao amin'ny fiaraha-monina nandritra ny fotoana nampaloto azy (Sal. 51:11). Natahotra izy fa tsy hahaverina azy amin'ny laoniny tanteraka ny fanatitra satria tsy misy fanatitra mahavotra ny fahotan'ny fijangajangana sy ny vonoan'olona izay efa nomaniny mialoha (Eks. 21:14; Lev. 20:10).
Ny fahasoavan'Andriamanitra izay tsy misy fepetra ihany no afaka mandray ny "fo torotoro sy mangorakorak"i Davida ho fanatitra, ary koa mampihavana azy indray amin'Andriamanitra (Sal. 51:16, 17). Naniry ny hiverina eo amin'ny fanatrehan'Andriamanitra izy raha nangataka ny hodiovina amin'ny hysopa.
Raha azon'Andriamanitra natao ny namela ny helok'i Davida noho ny fijangajangany sy ny famitahany ary ny vonoan'olona nataony, dia inona ny fanantenana ho anao?