Vakio ny Sal. 105:6, Kôl. 3:16, sy ny Jak. 5:13. Aiza ho aiza ny toeran'ny Salamo ao anatin'ny fanandramana ara-pivavahan’ny mpino?
Misy fomba tsotra ahafahantsika mampiditra ny Salamo ho eo amin'ny fiainantsika andavanandro, dia ny fanokanana fotoana isan’andro hamakiana Salamo iray, manomboka amin’ny Salamo voalohany, ary avy eo manaraka ny filaharany ao amin'ny boky. Fomba iray koa ny mamaky ny Salamo mifanaraka amin’ny toe-javatra iainanao ankehitriny, na manao ahoana na manao ahoana fisehon’izany; misy mantsy ny Salamo fitarainana, na isam-batan’olona na iarahana amin’ny besinimaro, ny Salamo fisaorana, ny hira Salamo, ny Salamo fibebahana, ny Salamom-pahendrena (fikatsahana fahendrena sy tari-dalana avy amin’Andriamanitra), ny Salamo ara-tantara, ny Salamo maneho fahatezerana sy haromotana, ary ny Salamo fanao any am-pivahiniana. Hodinihintsika mandritra ity telovolana ity ny ankamaroan’izy ireo, ka ao anatin’ny tontolon-kevitra isehoany no handinihantsika izany.
Ahoana àry no tokony ho fomba famakiantsika ny Salamo?
Vakio aloha ilay salamo, manaova famakafakana tsotra, avy eo mivavaha. Ny fisaintsainana ny Salamo dia mahatonga ny fandinihana ireto lafiny ireto: ny fomba firesak’ilay mpanao salamo amin’Andriamanitra ary ny anton’ny vavaka ataony. Diniho, inona no ifandraisan’ny fanandraman’ilay mpanao Salamo amin’ny toe- javatra iainanao, ary ahoana no mety hanampian’ilay Salamo anao hanambara ny fahatsapanao. Ho gaga ianao fa mifanaraka tsara aminao tokoa ny zavatra vakinao ao ankapobeny.
Raha misy zavatra manelingelina anao ao amin’ilay Salamo dia diniho andrao manitsy ny fanantenana poakaty anananao ankehitriny izany, ohatra, ao anatin’ny toe-javatra atrehinao. Diniho eo ambanin’ny fahazavan’i Kristy sy ny asany mitondra famonjena ary ny fanantenana maharitra atolotrizany ho antsika ny Salamo. Araka ny efa fantatsika, raha tsy izany dia tokony ho fantatsika fa ilaina mandrakariva ny mampifandray izay rehetra dinihintsika ao amin'ny Baiboly amin’i Kristy sy ny hazo fijaliana.
Jereo koa ireo antom-bavaka vaovao omen’ny Salamo, ary saintsaino ny lanjan'izany ho anao, ho an’ny fiangonanao, ary ho an’izao tontolo izao. Angataho Andriamanitra hametraka ny teniny ao am-ponao sy ao an-tsainao. Raha mifandraika amin’ny toe-javatra iainan’ny olona fantatrao ilay Salamo, dia manaova vavaka fanelanelanana ho an’izany olona izany. Ny mahavariana dia mahakasika lafiny maro dia maro eo amin'ny fiainana ny Salamo, ary hampitombo ny fahalalantsika ny famakiana sy ny fandraisana am-po izay ambarany amintsika.
Inona no hevitry ny hoe: “Aoka ny tenin'i Kristy hitoetra betsaka ao aminareo’’ – Kôl. 3:16? Nahoana ny famakiana ny Baiboly no dingana lehibe voalohany tsy maintsy atao ao anatin'izany fanandramana izany?