Vakio ny Sal. 75. Nahoana no zava-poana ny fireharehan'ny ratsy fanahy?
Amin'ny maha-Mpanjaka Azy dia Mpanome lalàna koa Andriamanitra (Sal. 99:7) ary Mpitsara (Sal. 98:9; Sal. 97:2). Manambana ny hanimba ny lamina efa napetrak Andriamanitra teto amin'izao tontolo izao mandrakariva ny ratsy fanahy, kanefa hitsara an'izao tontolo izao ny Tompo ka hamarana ny fanapahan'ilay ratsy (Sal. 75:8-10; Sal. 96:13).
Sary maro no maneho ny fandringanana tsy azo ivalozana atao amin'ny ratsy fanahy ao amin'ny Sal. 75. Maneho ny firehetan'ny fahatezeran'Andriamanitra (Jer. 25:15; Apôk. 14:10) ny sarin'ny kapoaka feno divay mandroatra (Sal. 75:8). Ny fanapahana ny tandroky ny ratsy fanahy dia maneho ny fiafaran'ny fahefana sy ny fanapahan'izy ireo, fa hasandratra kosa ny tandroky ny marina (Sal. 75:10). Mifidy ny "fotoana voafaritra tsara" Andriamanitra (Sal. 75:2, DIEM) mba hanaovany ny fitsarana. Mazava fa amin'ny fiafaran'izao tontolo izao no hanaovana izany fitsarana izany (Sal. 96:13; 1 Kor. 15:23-26).
Tafiditra ao amin'ny fitsarana ataon'Andriamanitra ny fandinihana ny fon'ny olona. Vakio ny Sal. 14:2; mampahatsiahy ny Gen. 6:5,8 izany. Samy maneho ireo toko sy andininy roa ireo fa ny fampiharana ny didim-pitsaran'Andriamanitra amin'izao tontolo izao dia ialohavan'ny fandinihan'Andriamanitra ny fiainan'ny olona sy ny fikatsahany ny olona azony vonjena. Misy fotoana iantsoana izany fitsarana izany hoe "fitsarana famotopotorana", rehefa miaro ny marina Andriamanitra ary manapaka izay ho anjaran'ny ratsy fanahy.
Toy ny ahoana no fisehon'izany?
Voalohany, manafaka ny olony amin'ny tanan'ny ratsy fanahy Andriamanitra (Sal. 97:10; Sal. 146:9) ary mandravaka famonjena ny mpandefitra (Sal. 149:4). Faharoa, haringana mandrakizay ireo ratsy fanahy tsy mibebaka (Sal. 97:3). Amin'ny tononkalo no anoritsoritan'ny mpanao Salamo sasany ny maha-tsinontsinona ny fiadian'ny olombelona eo anatrehan'ilay Mpitsara avy any an-danitra (Sal. 76:3-6). Andriamanitra mpamela heloka ihany koa Jehovah na dia manafay ny olona noho ny ratsy vitan'izy ireo aza (Sal. 99:8). Hampamoahina eo anatrehan'Andriamanitra koa ny vahoakan'Andriamanitra, fa tsy ny ratsy fanahy irery ihany (Sal. 50:4; Sal. 135:14).
Miresaka ny amin'ny zavatra izay voalaza any amin'ny andalan-teny hafa ao amin'ny Baiboly ny Salamo. Ambarany fa miantomboka amin'ny vahoakan'Andriamanitra ny fitsarana ary mahakasika ny tany manontolo avy eo (Deo. 32:36; 1 Pet. 4:17). Mitalaho amin'Andriamanitra ny mpanao Salamo mba hitsara azy kanefa miantehitra amin'ny fahamarinan'Andriamanitra koa izy mba hiaro azy (Sal. 7:8-11; Sal. 139:23,24).
Miantso antsika ny Salamo mba hiravoravo amin'ny fanantenana ny fitsaran'Andriamanitra (Sal. 67:4; Sal. 96:10-13; Sal. 98:4-9). Nahoana no vaovao mahafaly ho an'ireo voarakotry ny ran'i Kristy ny fitsaran'Andriamanitra?