Vakio ny Lev. 16:21, 29-34; Lev. 23:26-32; ary ny Heb. 9:23-28. Nahoana no tena nanan-danja tamin'ny Isiraely fahiny ny Andro Fanavotana?
Manao ny asa fisoronany isan'andro mandritra ny taona ireo mpisorona saingy amin'ny Andro Fanavotana, antsoina hoe Yom Kippour amin'ny teny hebreo, dia mitodika any amin'ny Fitoerana Masina ny mason'ny Isiraelita rehetra. Manome torolalana mazava ho amin'ny Andro Fanavotana ny Lev. 16 sy 23. Mitsahatra ny asa mahazatra rehetra. Mifady hanina ny rehetra.
Rehefa miditra ao amin'ny fanatrehan'Andriamanitra ao amin'ny efitra masina indrindra ho an'ny olona ny mpisoronabe dia mandinika ny fony izy ireo. Mitady an'Andriamanitra ao amin'ny fanetren-tena sy amin'ny fiaiken-keloka avy amin'ny fo izy ireo.
Na iza na iza tsy "miory" amin'ny Andro Fanavotana dia "nofongorana" tsy ho isan'ny vahoaka voafidy intsony (Lev. 23:27, 29). Amin'ny Andro Fanavotana dia nitondra ny ran'osilahin'i Jehôvah tao amin'ny Fitoerana Masina ny mpisoronabe ary rehefa nafafiny teo amin'ny rakotra fanaovam-panavotana izany dia nataony teo amin'ireo tandroky ny alitara volamena sy ny alitara varahina, hanadio tanteraka ny Fitoerana Masina. Rehefa "tanterany ny fampihavanana" dia nametraka ny tanany teo amin'ny osilahy velona ny mpisoronabe ka niaiky ny heloky ny Isiraely. Avy eo dia nentina tany an'efitra mba hosarahina amin'ny toby mandrakizay ilay osilahy (Lev. 16:20-22)
Nafindra tao amin'ny Fitoerana Masina ny ra mandritra ny asa fanompoana isan'andro, izay maneho ny fandraketana an-tsoratra ny fahotana (Jer. 17:1) sy ny maha-tompon'andraikitra an'Andriamanitra amin'ny fanafoanana izany tanteraka. Tamin'ny Andro Fanavotana, dia nafindra ivelan'ny Fitoerana Masina ny ra ary napetraka teo amin'ny lohan'ny osilahin'i Azazela, izay maneho an'i Satana ary manambara ny maha-tompon'andraikitra faratampony amin'ny olan'ny fahotana azy.
Nentina lavitra tany an'efitra ilay osilahy mba hananan'Andriamanitra Fitoerana Masina madio sy vahoaka madio amin'ny fiafaran'ny Andro Fanavotana. Ao amin'ny Fitoerana Masina any an-danitra, i Kristy dia manao ny asany ho antsika, tao amin'ny efitra masina aloha, ary ankehitriny, ao amin'ny efitra masina indrindra nanomboka tamin'ny taona 1844, tamin'ny fiafaran'ny 2300 andro.
Ho afaka amin'izany fitsarana lehibe izany isika noho ny amin'i Jesôsy, ilay Mpisolo antsika. Araka ny nambaran'i Ellen G. White, isika dia mahazo fanamarinana "amin'ny alalan'ny fahamarinany izay tsy nananantsika anjara akory ". — IFM, t. 16.
Noho izany fahamarinana izany —izay nomena antsika— dia mampahory ny fanahintsika isika, izany hoe miala amin'ny fahotana. Midika izany fa tsy manaiky ny ratsy am-pahafinaretana isika na koa manala tsiny ny fahotantsika na mifikitra amin'izany fa mitombo ao amin'ny fahasoavana ary miaina fiainam-pahamasinana.
Inona ny hevitry ny Andro Fanavotana eo amin'ny fiainantsika amin'izao fotoana izao? Nahoana izany no tokony hampisy fiovana eo amin'ny fomba fiainantsika?