Bokin’ny vavaka sy fihirana ho an’ny Jiosy sy ny Kristianina manerana ny tantara ny Salamo. Ary na dia ny fitenin’ny mpanao Salamo manokana miantefa amin’Andriamanitra aza no tena mibahana ao amin’ireo Salamo dia tsy avy amin’ny olombelona mety maty izany fa avy amin’Andriamanitra izay nanome tsindrimandry azy ireo.
Andriamanitra tokoa no nanome tsindrimandry azy ireo mba hanoratany ny zavatra nosoratany; izany no antony itenenan'Andriamanitra amintsika ao amin’ny Salamo – tahaka ny ao amin’ny Soratra Masina manontolo (2 Pet. 1:21) – amin’ny alalan'ireo mpanompony sy amin’ny alalan’ny Fanahiny. Samy namerina ny teny ao amin’ny Salamo avokoa na i Jesôsy, na ireo Apôstôly, na ireo mpanoratra ao amin’ny TV, ary nanondro izany ho Soratra Masina (Mar. 12:10; Jao. 10:34,35; Jao. 13:18). Azo antoka fa Tenin'Andriamanitra ireo, tahaka ny bokin’ny Genesisy sy ny Rômanina ihany.
Nosoratana tamin’ny tononkalo hebreo ny Salamo ary mpanoratra samy hafa tamin’ny andron'ny Isiraely fahiny no nanoratra azy. Araka izany dia maneho ny tontolon’izy ireo manokana ny Salamo na dia hafatra ho an’izao tontolo izao aza no raketiny. Zava-dehibe ho an’ny fahatakarana ny hafatra entir ny Salamo – izay namakivaky arivo taonamaro mandraka ankehitriny – ny fanekena ny maha-tenin’Andriamanitra izany, sy ny fandinihana akaiky ny rafi-tononkalony, ary ny tontolon-keviny ara-tantara sy ara-teôlôjia ary ara-pivavahana.