Eo anivon’ny Kristianina sasany dia toa manjaka ny finoana fa ny vavaka tora-po sy tsy nianarana ihany no tena atao hoe vavaka. Nomena valiny mahafa-po indrindra anefa ny mpianatr’i Jesôsy rehefa nangataka Taminy mba hampianariny mivavaka. Nametraka bokim-bavaka ao afovoan’ny Baiboly Andriamanitra, dia ny Salamo, tsy ny hampisehoana amintsika fotsiny ny fomba fivavak’ireo vahoakan’Andriamanitra tamin’ny andro fahiny, fa mba hampianarana antsika koa ny fomba fivavaka mety ankehitriny.
Hatrany am-piandohan’ny tantara no efa namolavola ny fivavaky ny vahoakan’Andriamanitra ny Salamo, anisan’izany ny vavak’i Jesôsy (1 Tant. 16:7,9; Neh. 12:8; Mat. 27:46; Efes.5:19). Hodinihintsika amin’ity herinandro ity ny anjara notanan’ny Salamo teo amin’ny fanampiana ny vahoakan’Andriamanitra namakivaky ny lalam-piainany sy mba hitombo amin’ny fifandraisany amin'Andriamanitra. Tokony hotsaroantsika fa ny Salamo dia vavaka, ary araka izany dia tsy hay tombanana ny lanjany, tsy noho ny fanazavana ara-teôlôjia entiny fotsiny fa noho ny fanatsarana sy fanovana entiny koa eo amin’ny vavaka ataontsika isam-batan’olona sy miaraka amin’ny besinimaro.
Nanampy mpino maro hanana fiainam-bavaka mafy orina sy mitohy ary feno fahafaham-po ny fanaovan’izy ireo ny Salamo ho tonom-bavaka.
Hitohy ny fandinihantsika ny Salamo mandritra ity herinandro ity, indrindra ao anatin’ny tontolon-kevitry ny fotoana izay maha-tojo zava-manahirana antsika.