Vakio ny IFM, toko 35: "Mangina, mitsahara!", sy ny toko 36: "Ny finoana mitarika hanendry".
"Ao amin'izay rehetra tezain'Andriamanitra no isehoan'ny fiainana izay tsy mifandrindra amin'izao tontolo izao, amin'ny fombany na ny fanaony; ary ny tsirairay avy dia mila ny hanao fanandramana manokana amin'ny fahazoana fahalalana ny sitrapon'Andriamanitra. Tsy maintsy ny tenantsika tsirairay no mandre Azy miteny amin'ny fo. Rehefa hampanginina ny feo hafa rehetra, ka miandry eo anatrehany am-pahatoniana isika, dia mampahazava kokoa ny feon'Andriamanitra ny fanginan'ny fanahy. Mibaiko antsika lzy hoe: 'Mitsahara, ka aoka ho fantatrareo fa Izaho no Andriamanitra' - Sal. 46:10. Eo izany no mety ahitana ny tena fitsaharana marina. Ary izany no tena fiomanana mahomby ho an'ny asan'Andriamanitra rehetra. Eo anivon'ny vahoaka miasa mafy, dia ho voahodidin'ny rivo-piainana feno fahazavana sy fiadanana ny fanahy nahazo aina toy izany. Hamoaka fofo-manitra ny fiainany, ary haneho hery avy amin'Andriamanitra izay hiantefa hatrany amin'ny fon'ny olona." IFM, t. 384.
"Tsy afa-po izy, ka velom-panontaniana hoe: Raha afaka nanao asa betsaka mahagaga tahaka izay efa natrehiny maso Jesôsy, nahoana Izy no tsy ho afaka hanome fahasalamana, hery sy harena ho an'ny olona rehetra, hanafaka azy amin'ny mpampahory azy ka hanandratra azy ho amin'ny fahefana sy ny voninahitra? Kristy milaza fa lzy Ilay nirahin'Andriamanitra, nefa mandà ny ho Mpanjakan'Isiraely, dia zava-miafina tsy hainy takarina izany. Diso ny fandraisana io fandavany io. Betsaka no nihevitra fa tsy sahy manamafy ny fitakiany lzy satria Izy tenany aza misalasala ny maha-avy amin'Andriamanitra ny asa nanirahana Azy. Tamin'izany no nanokafany ny fony ho amin'ny tsy finoana, ka nampitsimoka tao aminy ny voa izay efa nafafin'i Satana, dia ny fandraisana diso ny teny sy ny fihemorana." t. 405.
FANONTANIANA hifanakalozan-kevitra :
1. Raha misy olona manontany anao hoe: "tamin'ny inona no efa nanafahan'i Jesôsy anao?", dia inona no havalinao?
2. Ifanakalozy hevitra ny hoe: nahoana no indraindray avelan'Andriamanitra aiditra am-ponja sy vonoina ny olona tahaka an'i Jaona mpanao batisa? Inona ny fiononana na fanantenana ananantsika na eo aza izany zava-tsarotra izany?
3. Inona ny lesona azo tsoahina avy amin'ny tantaran'ny namahananri Jesôsy ireo olona dimy arivo, ho an'ny fiangonana izay tsy dia manana fahafahana ara-bola?
4. Manao ahoana ny fijerin'ny olona an'i Jesôsy ankehitriny raha mitaha amin'ny fanoritsoritana Azy ao amin'ny Mar. 5 sy 6? Izany hoe, ahoana ny amin'ireo olona izay mampiasa an'i Jesôsy mba hahazoana fahefaha ara-pôlitika sy hanjakazakana amin'ny hafa?