Hodinihina mandritry ny herinandro: Sal. 119:162; Jao. 16:13-15; 2 Pet. 1:20,21; Efes. 2:8,9; Rôm. 3:23,24; Rôm. 6:15-18.
Tsianjery: "Ato am-poko no iraketako ny teninao, mba tsy hanotako aminao." —Sal. 119:11.
Nisy zavatra nilain'ny taonjato faha-21 fatratra tao amin'ireo mpanavao fivavahana protestanta, dia tanjona ho an'ny fiainany. Miresaka ny amin'ireo olona miaina tsy misy tanjona ilay psikology amerikanina malaza Philip Cushman, ao amin'ny bokiny mitondra ny lohateny hoe "The Empty Self". Ivelambelany ny finoan'izy ireo. Tsy ahoan'izy ireo loatra ny zava-manan-danja marina, ary tsy misy na inona na inona hitany ho mendrika ny hamoizany ny ainy, noho izany dia zara raha manana antony ahavelomana koa izy ireo.
Samihafa tanteraka amin'izany anefa ireo lehilahy sy vehivavy ary ankizin'ny Fanavaozana ara-pivavahana protestanta. Nanana tanjona maharitra mendrika ho antom-piainany. Nanan-danja lehibe ny zavatra ninoan'izy ireo ary tsy nekeny velively ny hanao marimaritra iraisana handotoana ny fahamarinana. Tsy azo nosarahina taminy ny finoana niorenany. Ny fandavany izany finoana izany dia fandavana ny maha-izy azy ireo mihitsy. Nanana fiadanana anaty izy ireo na dia nanoloana ny fahafatesana aza.
Hodinihintsika ao amin'ny lesona amin'ity herinandro ity, miaraka amin'ny ohatra nalaina avy amin'ny Fanavaozana ara-pivavahana, ny amin'ny fampianaran'ny Soratra Masina izay manova fiainana, sy fototra iorenan'ny tanjona marina sy ny tena hevitry ny fiainana. Hanomana antsika ho amin'ny fotoan-tsarotra farany ao amin'ilay fifanandrinana lehibe ifanaovan'ny tsara sy ny ratsy ny fahatakarana ireo fahamarinana mandrakizay ireo. Tsy mbola tapitra ny ady izay natombok'ireo mpanavao fivavahana ary nantsoina isika handray ny faneva eo amin'izay nampitany izany tamintsika. Afaka mahita an'Andriamanitra sy ny fahalehibiazany koa isika, izay ampy hiatrehantsika ny zava-tsarotra rehetra, Andriamanitra Izay mampisy heviny sy tanjona ho an'ny fiainantsika, ary tsy misy na inona na inona eto an-tany mahavita izany amin'ny fiainantsika.