Vakio ny Apôk . 20:4-6. Inona no ataon'ny olo-marina mandritra ny arivo taona, ary nahoana izany no zava-dehibe?
Hanana tombontsoa handinika ny rariny sy ny fitiavan'Andriamanitra teo amin'ny famahany ny olan'ny fahotana, mandritra ny arivo taona, ireo olo-marina. Iza moa no tsy manana fanontaniana tiana hapetraka amin'Andriamanitra mikasika ny zavatra marobe? Mandritra ny arivo taona any an-danitra no hahafahan'ny voavotra mametraka ireny fanontaniana ireny. Raha tsy hita any an-danitra ny sakaiza na ny olo-malala iray, dia hanana tombontsoa ny hahatakatra amin'ny fomba feno kokoa ny fanapahan-kevitr'Andriamanitra ny voavonjy amin'izay. Amin'ny fomba vaovao, ary amin-kery lehibe kokoa noho ny hatrizay, no handraisan'ny voavotra ny ezaka goavana ataon'Andriamanitra mba hamonjena ny olombelona rehetra. Ho tsapan'izy ireo indray fa izay very rehetra dia tsy tonga any an-danitra noho izy ireo nanosi-bohon-tanana an'i Kristy. Amin'izay Andriamanitra vao hamoaka ny valim-pitsarana farany ho an'ireo very-ny fahafatesana faharoa, izay faharavana mandrakizay.
Vakio ny Apôk. 20:7-9. Ahoana no hifaranan’ny arivo taona? Inona ny anjara miandry an'i Satana sy ireo mpanara-dia azy?
Tsy hanana na iza na iza halaina fanahy sy hofitahina i Satana mandritra ny arivo taona. Izy sy ireo anjeliny irery no hisaintsaina ny vokatra mitera-dozan'ny fahotana. Rehefa mifarana ny arivo taona, dia hatsangana amin'ny maty ireo ratsy fanahy mba hiatrika ny fitsarana sy handray ny valin'asany farany (Apôk . 20:5).
Hanana mpanara-dia marobe i Satana amin'izany. Na dia niatrika tsy fahombiazana maro nisesisesy aza i Satana tao anatin'ny fifanandrinana lehibe, dia mampahery azy ny mahita ireo vahoaka sesehena izay very. Tsy mbola vonona hampitsahatra ny fikomiany izy ka mivoaka mba hamitaka ny "firenena maro." Ampirisihany izy ireo hanao ezaka goavana iray farany mba hanonganana ny seza fiandrianan'Andriamanitra sy hanorenana ny fanjakany (Satana). Ny teny hoe "Goga sy Magoga" dia ampiasaina hanehoana an'i Satana sy ireo tsy voavonjy izay velona tamin'ny vanim-potoana samihafa teo amin'ny tantara. Manodidina ny "tobin'ny olona masina sy ny tanàna malala" i Satana sy ireo mpanara-dia azy.
Rehefa mifarana ny arivo taona, dia tsy hatsangana amin'ny maty fotsiny ireo ratsy fanahy, fa hidina avy any an-danitra ilay Tanana Masina, i Jerosalema Vaovao (Apôk. 21:2)! Avy niaina sy nanjaka niaraka tamin'i Kristy tany Jerosalema Vaovao nandritra ny arivo taona ny olona masina. Ankehitriny, mifarana ny arivo taona, midina avy any an-danitra miaraka amin'Andriamanitra, Jesôsy, ireo anjely ary ireo voavonjy ilay tanana. Manatrika ny ady farany ao amin'ilay fifanandrinana lehibe ny rehetra. Hofongorana ny fahotana ary tsy hisy intsony!
Inona no ambaran'ny fotoana hanaovana ny fitsarana farany mikasika ny toetran'Andriamanitra?