Hodinihina mandritra ny herinandro : Apôk. 12:7-9; Ezek. 28:12-15; Isa. 14:12-14; Gen. 3:15; Jao. 17:24-26.
Tsianjery : « Ary nisy ady tany an-danitra: Mikaela sy ny anjeliny niady tamin’ilay dragona; ary ilay dragona mbamin’ny anjeliny kosa dia niady, nefa tsy naharesy, sady tsy nisy fitoerana ho azy intsony tany an-danitra. » – Apôk. 12:7,8.
FAMPIDIRANA
Raha tena tsara Andriamanitra, nahoana izao tontolo izao no dia ratsy toy izao? Nahoana Andriamanitra fitiavana no mamela ny hisian’ny ratsy marobe? Nahoana no misy zava-dratsy mianjady amin’ny olona tsara? Amin’ity herinandro ity isika dia handinika ilay ady ela nifanandrinan’ny tsara sy ny ratsy. Atombontsika amin’ny fikomian’i Losifera tany an-danitra izany, ka hodinihintsika ny niandohan’ny ratsy sy ny fahari-pon'Andriamanitra manoloana ny olan’ny fahotana.
Andriamanitra manana fitiavana mahatalanjona Andriamanitra. Fitiavana mihitsy no maha-lzy Azy (1 Jao. 4:7,8). Ny asany rehetra dia fanehoam-pitiavana (Jer. 31:3). Tsy azo terena na didiana na oviana na oviana ny fitiavana. Nilaza izany mazava i Ellen G. White raha nanoratra hoe: “Ny fitiavana ihany no mamoha ny fitiavana.” – IFM, t. 12. Raha lavina ny fahafaha-misafidy dia rava ny fahafahana mitia, ary raha rava ny fahafahana mitia dia foana ny fahafahana manana fahasambarana marina. Ny fitiavan’Andriamanitra no itaomany antsika hanompo sy hankatô Azy. Ao amin’ilay fifanandrinana lehibe eo amin’ny tsara sy ny ratsy dia ataon’Andriamanitra izay tsy hisehoan'ny ota intsony mandrakizay eo amin’izao tontolo àry rehetra izao. Ny tanjon’Andriamanitra dia ny haneho amin’izao tontolo àry rehetra izao fa nanao izay mahasoa indrindra ny voariny mandrakariva Izy. Manome toky antsika tsirairay ny fijerena izao tontolo izao amin’ny solomasom-pitiavan'Andriamanitra, araka ny fisehon'ilay fifanandrinana lehibe eo amin’ny tsara sy ny ratsy, fa handresy ny ratsy ny tsara ary ho mandrakizay izany.