Sabata hariva
Hodinihina mandritra ny herinandro: Apôk. 14:7, 9, 12; Apôk. 4:11; Apôk. 13:1, 2; Apôk. 12:3-5, 17; Apôk. 13:11-18.
Tsianjery: "Manamasìna azy amin'ny fahamarinana; ny teninao no fahamarinana." — Jao. 17:17.
Misy fitaovana ara-pitsaboana vaovao antsoina hoe "biopuce" na "puce électronique", izay mitovy habe amin'ny voam-bary iray azo ampidirina ao amin'ny marary. Ahitana ny mombamomba ny fitsaboana efa natao tamin'ilay marary izany, izay azo fantarina rehefa ampandalovina eo amin'ny "scanner" ny faritra nametrahana ilay biopuce. Ny Kristianina sasany dia mihevitra izany ho isan'ny fifanarahana miafina mikendry ny hampidirana ny mariky ny bibidia. Ho an'ny hafa indray, ny mariky ny bibidia dia mifandray amin'ny fehezan-tsipika eny amin'ireny boaty fitehirizan-tsakafo ireny na koa amin'ny tarehimarika miafina eo amin'ny ravim-bola ka ny fitambaran'izany dia manome ny isa 666. Ho an'ny sasany kosa dia baiko avy amin'ny franc-maçon, ny Illuminati, ny helikôptera maintin'ny ONU sy ny Firenena mikambana izany.
Ny tanjon'ny lesona amin'ity herinandro ity dia ny hampahafantatra ny fifanandrinana hoavy mikasikany fiankohofana. Hihantsy ny fahefan'Andriamanitra i Satana amin'ny fiezahana hanozongozona ny lalany. Raha lazaina mivantana dia ho tonga ivon'ny ady maneran-tany momba ny fiankohofana ny Sabata. Halan'i Satana ny Sabata satria halany ny Mpahary. Hampiasa ny fanerena hanoa lalana, sy ny herisetra ary ny fandrahonana izy mba hampitsaharana ny fanolorantsika tena ho an'i Kristy. Hisy ny fifandonam-pinoana mikasika ny andro fiankohofana marina sy ny sandoka. Ny antson' Andriamanitra farany dia antso ho amin'ny fahatokiana amin'i Kristy na dia eo aza ny fanenjehana, ny sazy ara-toe-karena, ny fampidirana am-ponja ary ny didy fampamonoana.
Ny lesona amin'ity herinandro ity dia manasongadina ny herin'i Jesôsy izay hitondrany antsika ho tafavoaka amin'ny ady farany eto an-tany.