Hodinihina mandritra ny herinandro: Apôk. 11:3-6; Zak. 4:14; Apôk . 12:5,6,14,15; Dan. 7:25; Isa. 54:17; Sal. 119:89; Apôk. 11:15-18.
Tsianjery : "Maina ny ahitra, malazo ny voniny; fa ny tenin'Andriamanitsika dia haharitra mandrakizay."– Isa. 40:8
Nandritra ny taonjato maro no nandinihana ny Tenin'Andriamanitra, nisalasalana ny amin'izany ary nandavana azy. Nogiazana tany amin'ny monastera samihafa izany, nodorana ampahibemaso ary norovidrovitina. Nesoina, nampidirina am-ponja ary novonoina maritiora aza ireo izay nino izany. Na izany aza dia nandresy ny tenin'Andriamanitra.
Nanenjika ireo Kristianina mahatoky tamin'ny Baiboly ny Fiangonan'ny Vanim-potoana Antenantenany. Nanazava ny haizina anefa ny Tenin'Andriamanitra. Tsy nanakana ny fitoriana ny Tenin'Andriamanitra ny fampahoriana sy ny fanenjehana. Rehefa notsaraina noho ny finoany ilay mpandika ny Baiboly tamin'ny teny anglisy antsoina hoe William Tyndale dia nanontaniana azy izay nanampy azy indrindra tamin'ny fampielezana ny Tenin'Andriamanitra. Nieritreritra ilay fanontaniana izy ary namaly hoe: "ny evekan'i Durham". Nanaitra ireo mpitsara tokoa izany valiteny izany. Nohazavain'i Tyndale fa nisy fotoana nividianan'io eveka io Baiboly dikanteny anglisy maro ka nandoroany izany ampahibemaso. Ny tsy fantatr'ilay eveka tamin'izany fotoana izany dia nanampy betsaka tamin'ny asan'ny fahamarinana izy. Novidiny tamin'ny vidiny ambony lavitra noho ny mahazatra ireo Baiboly. Tamin'ny alalan'ny vidin'izany boky marobe izany no nahafahan'i Tyndale nanonta Baiboly be lavitra noho ireo nodorana. Nihaniharina ilay fahamarinana nazera tamin'ny vovoka ka namirapiratra tamin'ny famirapiratany rehetra.
Amin'ity herinandro ity isika dia handinika ireo famelezana ratsy indrindra atao amin'ny Soratra Masina sy ny finoana kristianina. Nandriaka teny amin'ny lalamben'i Frantsa ny ra nandritra ny Revolisiona frantsay. Napetraka teo amin'ny toerana ampahibemaso tao Paris ny fanapahan-doha ary an'arivony maro no novonoina. Tonga fivavaham-panjakana ny ateisma (tsy finoana ny fisian'Andriamanitra). Na izany aza dia tsy azo nampanginina ny fijoroana ho vavolombelon'ny Tenin'Andriamanitra.