Mifandray akaiky amin'ny maha-Mpamorona an'Andriamanitra, eny tsy afa- misaraka mihitsy aza, ny maha-Mpanjaka sy Mpanapaka Azy. Ambara amin'ny fomba manetriketrika ny hoe: "Jehovah no Mpanjaka" ao amin'ny Sal. 93:1; Sal. 96:10; Sal. 97:1 ary ny Sal. 99:1, nefa manerana ny bokin'ny Salamo kosa no amerimberenana ny hevitr'izany.
Mitafy voninahitra sy fiandrianana ary hery Jehovah (Sal. 93:1; Sal. 104:1). Hodidinin'ny rahona sy ny haizim-pito Izy (Sal. 97:2), nefa koa "mitafy ny mazava tahaka ny lamba Izy' - Sal. 104:2. Manandratra ny herin'ny Mpanjaka sy ny famirapiratany ireo sary an'ohatra ireo, ary nofidina tamim-pitandremana fatratra mba hanehoana ny fahalehibeazan'Andriamanitra tsy misy toa azy izay tsy takatry ny fisainan'olombelona.
Vakio ny Sal. 97. Toy ny ahoana ny fiandrianan'Andriamanitra? (Sal. 97:2,10). Aiza ny faritry ny fanjakany? (Sal. 97:1, 5, 9)
Miseho eo amin'ny asa famoronany (Sal. 96:5) sy ny famonjeny (Sal. 98:2) ary ny fitsarany (Sal. 96:10) ny fanapahan'Andriamanitra. Manorina ny fanjakany ambonin'izao tontolo rehetra izao Izy (Sal. 47:6-9). Fanjakana mandrakizay ny fanjakan'Andriamanitra; tsy misy tahaka izany amin'ny heriny sy ny fiandrianany (Sal. 45:6; Sal. 93:1,2; Sal. 103:19). Miorina amin'ny famindrampo sy ny rariny ary ny fahamarinana ny fanjakan'Andriamanitra, ary mitondra filaminana sy fiadanana ho an'ny tontolo nohariana izany (Sal. 98:3; Sal. 99:4). Mampikambana ireo izay miankohoka amin'Andriamanitra any an-danitra sy ety an-tany amin'ny fiderana Azy ny Fanapahany (Sal. 103:20-22; Sal. 148). Salamo marobe no maneho ny taranak'olombelona rehetra miaiky ny maha-Mpanjaka an'Andriamanitra (Sal. 96:10; Sal. 97:1; Sal. 99:1; Sal. 145:11-13).
Tsy ny olona rehetra anefa, na koa ny mpanapaka eto an-tany no manao izany, farafahakeliny amin'izao fotoana izao. Mihaika mandrakariva ny fiandrianan'Andriamanitra ireo ratsy fanahy, izay mandà sy maniratsira ny Tompo ary mampahory ny olony (Sal. 14:1; Sal. 74:3-22). Na dia eo aza ny fahombiazan'ny ratsy fanahy sasany sy ny fahari-pon'Andriamanitra amin'izy ireny, dia matoky ny maha-Mpanjaka an'Andriamanitra ny mpanao Salamo ary mbola mitoetra ao amin'ny fahazoana antoka ny fitsarana marina ataony (Sal. 68:21; Sal. 73:17-20). Amim-pinoana no iravoravoan'ny vahoakan'Andriamanitra amin'ny fiantombohan'ny fanjakan'Andriamanitra tamin'ny alalan'ny asa fanavotana nataon'i Kristy sy iandrasan'izy ireo ny fahatanterahan'izany fanjakana izany amin'ny fiavian'i Kristy fanindroany (Mat. 12:26-28; 1 Kor. 15:20- 28).
"Hianareo izay tia an'i Jehovah, mankahalà ny ratsy" - Sal. 97:10. Nahoana ny fitiavantsika an'Andriamanitra no tokony hahatonga, antsika hankahala ny ratsy? Ahoana no ifandraisan'ireo hevitra roa ireo?