maso momba izay takona amin'ny masontsika ny fanoritsoritana ny fitsarana hita ao amin'ny Dan. 7 fotoana mahatalanjona ahafahantsika mahita ny fomba amahan'Andriamanitra ny olan'ny ota, sady amonjeny ireo izay maniry hifandray Aminy ao anatin'ny fanekena.
Vakio ny fanoritsoritana ny fitsarana famotopotorana ao amin'ny Dan. 7:9,10,13,14,22,26,27. Inona no tena ifantohan'ny fitsarana? Inona ny didim-pitsarana navoaka taorian'izany? Inona no ambaran'izany amintsika momba ny drafi-panavotana?
T’y isalasalana fa ny taranak'olombelona no tsarain'Andriamanitra. Manome toky antsika ny voalaza ao amin'ny Mpitt. 12:14 fa "ny atao rehetra dia ho entin'Andriamanitra ho amin'ny fitsarana", ary ampahatsiahivin'i Paoly fa tsy ilaintsika ny mifampitsara satria "samy hiseho eo anoloan'ny fitsaran'Andriamanitra isika rehetra" Rôm. 14:10. Mazava loatra fa tsy mila boky firaketana Andriamanitra mba hahafantarany izay voavonjy sy izay very, saingy inoana fa mametra-panontaniana ihany ireo anjely izay nandinika ny drafi-panavotana hatrany am-piandohana (1 Pet. 1:12). Hitan'izy ireo mantsy ny nandroahana an'i Satana sy ny ampahatelon'ny anjely tany an-danitra (Apôk. 12:4), ary izao dia entin'Andriamanitra eo anatrehany isika. Sokafan'Andriamanitra ny boky, ary avelany hahita ny zavatra rehetra isika.
Manome antsika fanazavana manan-danja momba ny fitsarana ny tantaran'ny nifonan'i Abrahama ho an'i Sodoma sy Gomora. Miharihary fa efa nofotopotorina ny fahotan'i Sôdôma; nambaran'Andriamanitra fa lehibe tokoa ny fitarainana momba azy noho ny fahotany (Gen. 18:20). Kanefa tsy ny amin'i Sodoma sy Gomora ihany no nanaovana fanadihadiana mialoha ny nandravana azy ireo. Navelan'Andriamanitra handinika tsara koa i Abrahama raha ara-drariny na tsia ny fanapahan-keviny handringana ny ratsy fanahy.
Ary iza ilay miseho eo afovoan'ny fitsaran'ny lanitra ao amin'ny Dan. 7? Tsy iza fa "ny zanak'olona", dia i Jesôsy ((Dan. 7:13, jereo koa ny Mat. 20:28), Izay hany antony mahatonga ny olo-masin'ny Avo Indrindra nomena rariny (Dan. 7:22). Ny fahamarinany tonga lafatra irery ihany no ahafahan'ny olony mandresy amin'ny fitsarana.
Alao sary an-tsaina hoe mijoro eo anatrehan'ny fitsarana lanao, miaraka amin'ireo tsiambaratelonao voaseho eo anatrehan'Andriamanitra masina. Inona no hany fanantenana ho anao amin'io fotoana io? (Jereo ny lesona Zoma)