Hodinihina mandritra ny herinandro: Mar. 4:35-41; Mar. 5:21-34; Rôm. 5:3-5; Jôba 19:23-27; Joba 23:8-12; Lio. 24:13-27; Rôm. 8:18,28.
Tsianjery "Ary tsy izany ihany, fa aoka isika hita amin'ny fahoriana aza, satria fantatsika fa ny fahoriana mahatonga faharetana; ary ny faharetana mahatonga fahatsaram-panahy voazaha toetra; ary ny fahatsaram-panahy voazaha toetra mahatonga fanantenana; ary ny fanantenana dia tsy mampahamenatra, satria ny Fanahy Masina, Izay nomena antsika, no nentiny nampidina ny fillavan'Andriamanitra ho ao am-pontsika." - Rôm. 5:3-5
Indray takariva, raha nidina teny amin'ny faravodilanitra ny masoandro, dia nisy tovovavy iray nandeha nody; nisy tafio-drivotra mafy taminizay. Nanafaingana ny diany day tovovavy, satria fantany fa mbola lavitra ny lalana. Nisy piti-drano kely iray nilatsaka teo amin'ny takolany, avy eo nisy iray hafa, ary tsy ela akory dia kotsan'ny orana izy.
Nanomboka nihazakazaka izy mandra-pahatonga teo am-baravaran'ny trano fonenany ka nanokatra izany. Nihazakazaka nitsena azy ny rainy izay nahatazana azy avy teo am-baravarankely. Rehefa nanafy azy bodofotsy ny rainy dia nanontany azy hoe: "Hitako ianao nandeha tamin'ny orana. Nahoana ianao no nijanona sady niandrandra sy nitsiky isaky ny nisy tselatra be teny amin'ny lanitra?"
"Hay ve e! Nijanona mba hiandrandra aho," hoy ilay tovovavy, "satria naka sary ahy Andriamanitra!
Inona no fihetsika ataontsika rehefa misy tafio-drivotra eo amin'ny fiainana, na rehefa misy toe-java-tsarotra eo amin'ny fifandraisantsika amin'Andriamanitra? Mitanondrika ve isika rehefa milatsaka eo an-damosintsika ny orana sa miandrandra kosa, satria fantatsika ary itokiantsika fa eo Andriamanitra raha mitodika Aminy isika?
Mandritra ity herinandro ity, dia hodinihintsika ny fihetsika ataontsika matetika rehefa sarotra ny fiainana. Hojerentsika ny fomba ahafahana mampiasa ireo sakantsakana eo amin'ny fiainana mba hanamafisana, fa tsy handemena, ny fifandraisana tena manan-danja indrindra ho antsika.