NY MARIKY NY BIBIDIA
Rehefa nandeha ny taona, ka tsy mbola niseho ireo tranga farany toy ny fametrahana ny mariky ny bibidia, dia naneho fisalasalana ny olona sasany. Eny, naneho tsy finoana aza izy ireo mikasika ny fanazavantsika ireo toe-javatra hitranga amin'ny andro farany, anisan'izany ny mahatonga ny Sabata sy ny Alahady ho ivon'ilay fifanandrinana farany.
Mazava ny voalaza ao amin'ny Apokalipsy: na isika mivavaka amin'ny Mpahary, na amin'ny bibidia sy ny sariny. Ary satria ny Sabata andro fahafito no famantarana fototra ny maha-Mpahary an'Andriamanitra - izay efa hatrany Edena mihitsy (jereo ny Gen. 2:1-3)-dia tsy tokony hahagaga raha ny Sabata no ho lohahevitra ifanolanana ao anatin'ny resaka fiankohofana amin'ny Mpahary. Ary tsy kisendrasendra koa raha ny fahefan'ny bibidia no fahefana nanova ny lalana momba ny Sabatan'ny Baiboly ho lalàn'ny Alahady, izay tsy voamarina akory ao amin'ny Baiboly. Ao anatin'ny tontolon-kevitra eto dia mitombina tsara ny hoe: tafiditra ao anatin'ny resaka fiankohofana ny hevitra momba ny Sabata sy ny Alahady -averina indray, na izany fiankohofana amin'ny Mpahary (jereo ny Apôk. 14:6,7) na amin'ny bibidia. Ankoatra izany dia misy fanambarana mialoha mikasika ny fifanoheran'ny Sabata andro fahafito sy ny lalàn'olombelona koa ao amin'ny Testamenta Vaovao.
Vakio ny Mat. 12:9-14 sy ny Jao. 5:1-16. Inona no nahatonga ireo mpitondra fivavahana naniry hahafaty an'i Jesôsy ?
Ao amin'ny Mat. 12, nanao ahoana ny fihetsik'ireo mpitondra fivavahana rehefa nanasitrana ilay lehilahy maty tanana tamin'ny andro Sabata i Jesosy? "Ary ny Fariseo dia lasa nivoaka ka niara-nisaina mba hahafaty Azy." - Mat. 12:14. Mamono olona mihitsy ve noho ny amin'ny Sabata? Ao amin'ny Jao. 5:1-16, rehefa nanasitrana olona hafa indray i Jesosy tamin'ny andro fahafito, dia "nanenjika an'i Jesôsy " ny Jiosy, "satria nanao izany zavatra izany tamin'ny Sabata Izy" and. 16.
Mamono olona mihitsy ve noho ny amin'ny fampianaran'olombelona mifanohitra amin'ny Sabata andro fahafito? (tsy misy mandrara ny fanasitranana amin'ny andro Sabata ao amin'ny Baiboly, toy ny tsy ahitana filazana ao momba ny nanoloana ny Sabata ho Alahady.) Na dia tsy mitovy tanteraka amin'izay nahazo an'i Jesosy teto aza no hitranga any am-parany, dia misy itoviany betsaka ihany: miady amin'ny lalan'Andriamanitra ny lalan'olombelona, ary ny Sabatan'ny Baiboly avokoa no toherina amin'izany.
Ho faty noho ny amin'ny didin'Andriamanitra anankiray ve? Nahoana no mora foana ny mahita hevitra mba tsy ho tonga amin'izany fahafatesana izany?