FIANARANA FANAMPINY
Vakio ny Patriarka sy Mpaminany, Ellen G. White, “Mosesy,” tt. 251–256.
Ny fiantsoana nampientam-po teo amin’ny roimemy nirehitra no mety ho traikefa tena nanova ny fiainan’i Mosesy. Ny zava-dehibe hafa rehetra teo amin’ny fiainany dia niankina tamin’ny valin-teniny tsara sy nankatoavin’Andriamanitra tamin’ny fanirahany azy hitarika ny Hebreo hiala any Egypta ho any amin’ny tany nampanantenaina.
Eny, fantatsika izao ny fomba niafarany. Fa apetraho amin’ny toeran’i Mosesy ny tenanao tamin’ny fotoana nirehitra ny roimemy. Nandositra an’i Egypta izy mba hamonjy ny ainy. Taranaka Hebreo vaovao no niseho nandritra ny 40 taona, ka maro tamin’izy ireo no mety tsy nahafantatra firy momba azy, na angamba aza ny zavatra reny momba azy dia diso, voasivana tamin’ny tantara izay miova rehefa mandeha ny fotoana. Kanefa ankehitriny, nantsoin’Andriamanitra izy hitarika ity vahoaka ity hiala amin’ny firenena mahery? Tsy mahagaga raha nisy fisalasalana izy tamin’ny voalohany!
Eny, asa tena nitaky be izany, saingy alao sary an-tsaina hoe inona no ho very taminy raha toa ka nandà farany an’Andriamanitra izy. Mety ho nanjavona teo amin’ny tantara fotsiny izy fa tsy—amin’ny alalan’ny herin’Andriamanitra miasa ao aminy—nanao tantara ara-bakiteny ary lasa iray amin’ireo olona lehibe indrindra sy manan-kery indrindra, tsy ao amin’ny Baiboly ihany fa eto amin’izao tontolo izao mihitsy.
FANONTANIANA hifanakalozan-kevitra
1. Nandritra ny taona mangina lany tany an-tany efitra, i Mosesy dia nanao izay nantsoin’Andriamanitra azy hatao: izy dia raim-pianakaviana, nikarakara ondry, ary nanoratra boky ara-Baiboly roa ambany fitaomam-panahin’Andriamanitra talohan’ny niantsoana azy ho mpitarika lehibe ny vahoakan’Andriamanitra. Inona no ampianarin’ny traikefan’i Mosesy antsika momba ny adidintsika eo amin’ny fiainana?
2. Mety hilaza ny olona iray fa, raha ny fijery ivelany, ny fialan-tsinin’i Mosesy dia tena azo ekena, sa tsy izany? Nahoana no tokony hino ahy ny vahoaka? Iza moa aho raha vao manomboka? Tsy mahay miteny aho. Inona no tokony holazain’ity tantara ity antsika momba ny fomba hianarana hitoky fa Andriamanitra dia afaka manampy antsika hanao izay antsoiny antsika hatao?