Azo inoana fa ny lafiny mahatsiravina indrindra amin'ny fiainana eto amin'izao tontolo izao, izay tafasaraka amin'ny Mpahary azy, dia ny fahafatesana miandry ao ambadiky ny fiainana tsirairay, vonona hamely amin'ny fotoana rehetra. Izany no "tambin'ny ota", sazy aloantsika noho ny fisarahana amin'llay Loharanon'aina tokana eto amin'izao tontolo rehetra izao, dia ny Mpahary. Noho izany, mitana anjara lehibe ao amin'ny faminaniana ara-Baiboly ny maha-zava-misy ny fahafatesana, ary indrindra koa ny vahaolana eo anatrehan'izany, izay hita ao amin'i Jesosy sy ny fahafatesany ary ny fitsanganany tamin'ny maty.
Ny filazana voalohany ny amin'ny fahafatesana ao amin'ny Baiboly sy ny nitrangan'izany voalohany dia manazava tsara io lohahevitra lehibe ao amin'ny faminaniana io, ary manampy antsika hahatakatra ny maha-ratsy indrindra ny olan'ny fahotana, sy hahafantatra ny vahaolana omen'Andriamanitra eo anatrehan'izany.
Vakio ny Gen. 2:15-17, Gen. 4:8-15, 1 Kôr. 15:15-19, sy ny Apôk . 1:18. Inona no ambaran'ireo andininy ireo amintsika izay ahitana ny filazana voalohany ny amin'ny fahafatesana sy ny nitrangan'izany voalohany - momba ny antony mahatonga ny olona andairan'ny fahafatesana, ny fomba fijerin'Andriamanitra ny fahafatesana, ary ny vahaolan'Andriamanitra ho antsika?
Fitenin'ny olona matetika rehefa misy fahafatesana ny hoe: "fiainana daholo izany". Lainga anefa io. Ny fahafatesana dia mifanohitra amin'ny fiainana; fahafoanan'ny fiainana izany; tonga tsy nasaina ny fahafatesana, ary tsy natao ho fanandramana hiainantsika eto an-tany velively. Na manjary efa fahitantsika aza ny fahafatesana, dia mbola mampitaraina mafy ny fontsika ihany ny fihaonana aminy; toy ny tsapan'ny olombelona fa tsy ara-dalana izany. Maharary antsika mandrakariva ny fahafatesana. Misy tranga sasany amin'ny fahafatesana anefa toa mampalahelo kokoa noho ny hafa, toy ny fahafatesan'ny zaza. Antenaintsika ankapobeny fa ny ray aman-dreny no tokony ho faty alohan'ny zanany, ka nanjary nekentsika ho zavatra ara-dalàna eo amin'ny fiainana izany.
Tsy araka izay anantenana azy anefa ilay fahafatesana voalohany voarakitra ao amin'ny Soratra Masina. Nianjadian'ny fahoriana lehibe i Adama sy i Eva talohan'ny fahafatesan'izy ireo, rehefa maty i Abela zanany, izay olo-marina, novonoin'i Kaina rahalahiny, izay tsy marina. Fahafatesana tsy ara-drariny tokoa io fahafatesana io.
Saintsaino ny amin'i Jesôsy Ilay marina, izay novonoin'ny olo-meloka, tahaka an'i Abela. Misy fahafatesana tsy ara-drariny mihoatra atra noho ny fahafatesan'i Kristy ve? Inona ireo teboka hafa itovian'ny fahafatesan'i Abela amin'ny fahafatesan'i Kristy? Diniho ny fomba nahafatesan'i Abela; ahoana no anampian'izany antsika hahatakatra ny antony ananan'i Jesôsy "ny fanalahidin'ny fahafatesana sy ny fiainan-tsi-hita", sy izay omen'Andriamanitra antsika ao Aminy?
Raha tsy misy vahaolana ny fahafatesana, nahoana ny fiainantsika no manjary tsy misy dikany sy tsy mahasoa na amin'inona na amin'inona? Tsy manambara amintsika ve izany fa tokony ho velom-pisaorana an'i Jesôsy isika noho izay nataony ho antsika?