Vakio ny Jao. 4:7-15. Ahoana no nampiasan'i Jesôsy io fihaonana io mba hanombohana fijoroana ho vavolombelona tamin'ilay vehivavy?
"Nanakana an'ilay vehivavy tsy hanolotra izany fahasoavana izany ho an'i Jesôsy ny fifankahalana nisy tamin'ny Jiosy sy ny Samaritana, nefa niezaka ny hahita ny fanalahidy hanokatra io fo io Jesôsy, ka tamin'ny fahaizana nateraky ny fitiavan'Andriamanitra, dia nangataka fahasoavana Izy fa tsy nanolotra fahasoavana. Nety ho nolavina ny fahasoavana natolotra, fa ny fitokisana kosa miantso fitokisana." - IFM, t. 136, ed. 2023.
Fantatr'i Jesôsy izay ao am-pon'ny hafa, tahaka izay niseho tamin'ny fihaonany tamin'i Nikôdernosy. Ho setrin'ny fahatairan'ilay vehivavy noho ny amin'ny Jiosy iray nangataka fanampiana avy tamin'ny Samaritana anankiray, dia novantanin'i Jesôsy ny resaka: "Raha fantatrao ny fanomezan'Andriamanitra sy Izay miteny aminao hoe: Omeo Aho hosotroiko, dia hianao no ho nangataka taminy, ka nomeny rano velona." - Jao. 4:10.
Tahaka ny valintenin'i Nikôdemosy raha niresahan'i Jesôsy mikasika ny fahateraham-baovao ny valin-tenin'ilay vehivavy, izay nanontany hoe: "Hatao ahoana no hahatonga izany zavatra izany?" - Jao. 3:9. Hoy ravehivavy: "Tompoko, tsy manana fanovozana Hianao, sady lalina ny fantsakana; koa avy aiza no ahazoanao izany rano velona izany?" - Jao. 4:11. Samy nampitodihan'i Jesôsy hifantoka tamin'ny fahamarinana ara-panahy ambony indrindra izay nilain'ny tsirairay avy tamin'izy ireo ho heno sy ho takatra ilay mpampianatra Jiosy fanta-daza sy ilay vehivavy Samaritana nanana toetra misalasala. Tao amin'ny toerana nisy azy ireo tsirairay dia nitovy ny zavatra nambaran'i Jesôsy taminy: nila ny fanandraman'ny fiovam-po izy ireo.
Inona ny tantara fototra ao amin'ny Testamenta Taloha izay iorenan'ny fanambaran'i Jesôsy momba ny rano velona? (Jer. 2:13; Zak. 14:8. Sarobidy eo amin'ny fiainana tokoa ny rano; tsy afaka hiaina tsy misy azy ny olombelona; amin'izany no mahatonga ny rano ho sary mety indrindra hanehoana ny fiainana mandrakizay. Hoy i Jesôsy: "fa na iza na iza no misotro ny rano izay homeko azy dia tsy hangetaheta mandrakizay; fa ny rano izay homeko azy dia ho loharano miboiboika ao anatiny ho fiainana mandrakizay." - Jao. 4:14.
Vakio ny Jao. 7:37,38. Inona no ambaran'i Jesôsy amintsika ao anatin'ireo andalan-teny ireo, ary ahoana no hiainantsika ny fanandramana izay ampanantenainy eto?