Hodinihina mandritra ny herinandro: Dan. 2:20-23; Dan. 6:10,11; Asa. 20:36; Gen. 5:22-24; Eks. 33:15-23; Eks. 32:31,32.
Tsianjery :
"Izaho tia an'i Jehôvah, satria efa nandre ny feon'ny fifonako lzy. Satria efa nanongilana ny sofiny tamiko lzy, dia hiantso aho, raha mbola velona koa." - Sal. 116:1,2.
Alao sary an-tsaina hoe tsy miresaka firy amin'ny namanao akaiky indrindra na amin'ny vadinao ianao. Tsy ho ela dia ho rava ny fifandraisana, ary hipoitra ny olana. Tahaka izany koa ny vavaka, ampahany tena ilaina amin'ny fifandraisana akaiky amin'Andriamanitra izany. Fahazarana ara-panahy iankinan'aina, izay ilain'ny tsirairay sy afaka manatanjaka antsika izany. Raha tsy mivavaka matetika sy tsy mitsahatra isika, dia haniasia lavitra ny Tompo na ho ela na ho haingana.
Mahita fiainan'olona isan-karazany isika ao amin'ny Baiboly, izay samy manana ny fomba fivavahany. Azontsika dinihina ny akon'ny fivavahany tamin’Andriamanitra teo amin'ny fifandraisany Taminy, hahitantsika ny fomba sy ny antony mety hivavahantsika koa, ary ny fomba nanovan'ny vavaka nataon'izy ireo ny fiainan'ny hafa. Marina tokoa fa ny fiainam-pivavahantsika dia tsy misy fiantraikany amin'ny tenantsika ihany fa amin'ny hafa koa.
Toy ny fandinihana Baiboly ihany, ity lohahevitra momba ny vavaka ity dia sady goavana no manan-danja ary midadasika, ka tsy ho ampy ny tapa-bolana monja handinihana izany. Hianatra lesona vitsivitsy avy amin'ireo olona ao amin'ny Baiboly isika amin'ity herinandro ity, izay nivavaka ka naneho ny mahazava-dehibe ny vavaka mba hananana fifandraisana mafy orina amin'Andriamanitra. Andeha handray lesona avy amin'ny oha-piainan'izy ireo.