Rehefa mijery fitaratra na mijery sary isika dia mahita ny endritsika, saingy fisaka izany ary ny lavany sy ny sakany ihany no azontsika refesina aminy. Amin'ny lafiny sasany, dia ny sary sokitra no manome sary mazava kokoa nefa tsy mbola mahatoraka ny tena izy izay sady miaina no mihetsika izany. Mbola midadasika noho izany anefa ny hevitry ny Baiboly rehefa miresaka momba ny endrika, na dia ireo fanehoana latsadatsaka kokoa ireo aza no entina milaza izany.
Vakio ny Gen. 1:26,27; Gen. 5:3; 1 Kor. 15:49; 2 Kor. 3:18 ary ny Heb. 10:1. Fintino ny hevitra samy hafa fonosin'ny "endrika" ao amin'ireo toko sy andininy ireo. Ahoana no maha samy hafa izany amin'ny fanoritsoritana an'i Jesôsy ho endrik'Andriamanitra?
Nohariana hanana fitoviana be amin'Andriamanitra, araka izay tratra, ny olombelona: ara-batana, ara-panahy, ara-pifandraisana ary eo amin'ny lafin'ny asa. Na izany aza dia lafiny voafetra ihany no anehoantsika taratra ny endrik Andriamanitra, ary efa nosimban'ny fahotana aza izany. Amin'ny alalan'i Jesôsy kosa, dia azontsika atao ny "mahita" ilay Andriamanitra tsy hita maso. "Izay nahita Ahy dia nahita ny Ray hoy Izy (Jao. 14:9). "Mitovy tanteraka amin'ny an'Andriamanitra ny maha izy Azy"-Heb. 1:3, DIEM. Izy no fisainan Andriamanitra natao ren'ny sofin'ny olona ary toetran'Andriamanitra navela ho hitan'ny maso.
Vakio ny Mat. 11:27 sy ny Jao. 1:1,2,14,18. Nahoana no i Jesôsy irery ihany no afaka maneho ny Ray? Mariho ireo fomba hafa nanoritsoritan'i Jesôsy ny fifandraisany amin'Andriamanitra Ray: "Ny Raiko miasa mandraka ankehitriny, ary Izaho koa miasa." - Jao. 5:17 "Izaho sy ny Ray dia iray ihany." - Jao. 10:30 "Tsy misy olona mankany amin'ny Ray, afa-tsy amin'ny alalako." - Jao. 14:6 Imbetsaka koa no niresahan'i Jesôsy momba ny tenany tamin'ny alalan'ny fiteny manondro an'Andriamanitra: "IZAHO (...)" (jereo ny Eks. 3:14); "Izaho no mofon'aina" - Jao. 6:35; "Izaho no fahazavan'izao tontolo izao" Jao. 8:12; "Izaho no Mpiandry Tsara" - Jao. 10:11,14; "Izaho no fananganana ny maty sy fiainana" - Jao. 11:25; "Izaho ao amin'ny Ray, ary ny Ray ato amiko" - Jao. 14:11; ary "Fony tsy mbola ary Abrahama, dia Izy Aho." - Jao. 8:58. Raha toa ka tsy Andriamanitra i Jesôsy, inona moa no hevitr'izany, afa-tsy hoe naniraka zavaboary iray ho faty ho antsika Andriamanitra Ray? Nahoana no samy hafa tanteraka amin'izany-ary manan-danja lehibe -ny hoe Andriamanitra mihitsy, ao amin'i Kristy, no maty ho antsika?