Miteraka fanontaniana manan-danja ny Johahevitry fitsaran'Andriamanitra: ahoana no hihavanan'ny vahoakan'Andriamanitra amin' Andriamanitra sy hananany toky ný amin'ny famonjena amin'ny fotoam-pitsarana? Vakio ny Sal. 94:14; Sal. 105:7-10; Dan. 7:22.
Voaro ny vahoakan'Andriamanitra satria nataon'Andriamanitra ho fonenany i Ziona (Sal. 76:1, 2) ary naoriny amin'izy ireo amin'ny maha-fananany sarobidy azy ny fanekeny mandrakizay (Sal. 94:14; Sal. 105:8-10). Manome toky ny vahoaka izay nanaovany fanekena Andriamanitra fa tsy hahafoy azy ireo. Tsy izany ihany anefa no ataony fa manao izay hihazonana azy ireo ho eo Aminy Izy mba hahatonga azy ireo hitoetra tsara. Mamela ny helok'izy ireo Izy (Sal. 103:3); manoro lalana sy mitahy ary manome hery ny olony Izy (Sal. 25:8-11; Sal. 29:11; Sal. 105:24). Natao ny fitsaran'Andriamanitra mba hampitodihana ny olona ho amin'ny fahamarinana sy hanehoana fa mihevitra azy ireo Andriamanitra (Sal. 94:8-15).
Ny Sal. 105 ankapobeny dia maneho ny fahatokian'Andriamanitra tamin'ny fanekeny teo amin'ny tantaran'ny Isiraely. Teo Andriamanitra tao anatin'ny toe-javatra rehetra, na ny tsara na ny ratsy. Izy no nitantana an'i Josefa hankany Egipta ary tamin'ny alalan'i Josefa no namonjeny ny olony sy ny firenena tany amin'izany tany izany nandritra ny mosary lehibe (Sal. 105:16-24). Jehovah no nampiandraikitra an'i Mosesy ny fitarihana ny olony hiala tamin'ny fanandevozan'ny Egiptianina. Nataony ho azy ireo tamin'ny famantarana maro sy fahagagana izany (Sal. 105:25-38).
Nomen'Andriamanitra ny vahoakany ny Tany Nampanantenaina (Sal. 105:11, 44) ary nampitoeriny teo amin'izy ireo mandrakariva ny fiarovany (Sal. 105:12-15). Nampitombo isa azy ireo Izy (Sal. 105:24), nanafaka azy tamin'ireo tompony (Sal. 105:37,38), ary nanome izay nilainy isan'andro (Sal. 105:39-41). Tsy isalasalana ny fifehezan'Andriamanitra amin'ny maha-Mpanjaka Azy ny zavatra rehetra mahakasika ny olony - fahamarinana izay tian'ny mpanao Salamo hotsaroan'ny vahoakan'Andriamanitra mandrakariva izany.
Rehefa mahatsiaro ny fanekeny Andriamanitra, dia mihoatra lavitra noho ny fahatsiarovana izany satria miteraka asa mandrakariva (Gen. 8:1; 1 Sam. 1:19; Sal. 98:3; Sal. 105:42-44). Tahaka izany koa, rehefa nantsoina mba hahatsiaro ireo fahagagana nataon'Andriamanitra sy ny fitsarana ny olona, dia midika izany fa tokony hivelona amin'ny fomba izay manome voninahitra an'Andriamanitra izy ireo.
Ao amin'io fanekena io, ny antso voalohany indrindra miantefa amin'ny Isiraely dia ny hitoerany ho mahatoky amin'ny fanekena amin'ny alalan'ny fitandremana ny lalàn'Andriamanitra (Sal. 78:5-7; Sal. 105:45). Antsoina koa ireo vahoakan'Andriamanitra mba hijoro ho vavolombelony any amin'ny firenena hafa, satria iriny ny hikambanan'ny firenena rehetra amin'ny Isiraely olony (Sal. 105:1,2). Amin'izany no hahatonga an'izao tontolo izao ho voaro amin'ny faneken'ny fiarovan'ilay Andriamanitra Tsitoha sy be indrafo (Sal. 89:28-34).
Inona no ananantsika ao amin'i Jesôsy, izay maneho ny antony hahatanterahan'ireo teny fikasana nomena ny Isiraely fahiny amintsika? (Jereo ny Gal. 3:26-29).