Vakio ny Sal. 19:7; Sal. 93:5; Sal. 119:165; Sal. 1:2,6; Sal. 18:30 ary ny Sal. 25:10. Inona ny lohahevitra iraisan'ireo rehetra ireo?
Misy fiantraikany ara-teôlôjia eo amin'ny maha-azo itokiana ny teni- vavolombelon'Andriamanitra ny fahamboniany eo amin'izao tontolo izao amin'ny maha-Mpamorona sy Mpanjaka ary Mpitsara Azy. Ny teni-vavolombelona ('edut amin'ny teny hebreo, "didy", "lalàna") dia manondro ny lalàna sy ny fitsipika izay ifehezan'Andriamanitra ny fiainana ara-pivavahana sy ara-piarahamonin'ny vahoakany (Eks. 32:15). "Marina indrindra" ireo (Sal. 93:5), ary maneho taratra fa nampitoerina ka tsy hihetsika ny seza fiandrianan'Andriamanitra sy ny tontolo izay nohariany sy tohanany (Sal. 93:1,2). Ny teny hebreo nadika hoe "marina indrindra" (avy amin'io teny io ny hoe "amena") dia mampita izao hevitra izao: azo itokiana, mahatoky ary mitoetra (2 Sam. 7:16; 1 Tant. 17:23). Tsy miova ny lalàn'Andriamanitra ary tsy mety simba.
Miantoka ny fahamarinan'ny teny fikasany sy ny didiny Andriamanitra. Sady manome antoka ny amin'ny tsy fiovan'ny fitsipiny ny fahatokian'Andriamanitra no mitaky ny hamalian'ny olony izany amin'ny fitokiana Aminy sy ny fankatoavana Azy.
Etsy andanin'izay, dia amin'ny alalan'ny tononkalo no ampitoviana ny tsy fisian'ny rariny eto amin'izao tontolo izao amin'ny fihorohoron'ny fanorenan'ny tany (Sal. 18:7; Isa. 24:18-21). Ny lalàn'Andriamanitra no mampianatra ny olona momba ny lalan'ny fiainana feno fahamarinana izay hahajoro amin'ny fotoam-pitsaran'Andriamanitra. Koa tsy hangozohozo ny marina satria miorina tsara ao amin'ny lalàn'Andriamanitra, izay mampitoetra sy miaro azy, ary ny fo ho tafatoetra ao amin'i Jehovah (Sal. 112:1,6,7). Tsy hisy na inona na inona hahatafintohina ireo izay mitandrina ny didin'Andriamanitra (Sal. 119:165). Midika ho fiarovan'Andriamanitra sy fitarihany eo amin'ny fiainana izany (Sal. 1:2,3,6).
Tondroina ho fanilon'ny tongotry ny mpanao Salamo ny tenin'Andriamanitra, izay miaro azy amin'ny fandrika miafina avelatry ny fahavalo (Sal. 119:105,110). Mazava loatra fa ny fiadanana feno, izay iainan'ireo tia ny didin'Andriamanitra, dia tsy vokatry ny tsy fisian'ny fizahan-toetra mihitsy (Sal. 119:161); tsy izany fa vokatry ny fitoerana eo amin'ny fanatrehan'Andriamanitra sy ny fifandraisana tsara Aminy izany.
Fomba ahoana no nanampian'ny fitandremana ny lalàn'Andriamanitra sy ny fitsipika ary ny teni-vavolombelona anao teo amin'ny fiainanao? Etsy ankilany, inona no nanjo anao noho ny fandikana izany?