Hodinihina mandritra ny herinandro : Lio. 19:41—44; Mat. 23:37, 38; Heb. 11:35-38; Apôk. 2:10; Asa. 2:44-47; Jao. 13:35.
Tsianjery : « Aza matahotra ianao, fa momba anao Aho; ary aza miherikerika foana, fa Izaho no Andriamanitrao; mampahery anao Aho sady mamonjy anao; eny, mitantana anao amin'ny tanana ankavanan'ny fahamarinako Aho. » – Isa. 41:10.
FAMPIDIRANA
Andeha hataontsika hoe mpiandry ondry miandry ny ondriny eo amin'ny tendrombohitra Oliva ianao ka mahatazana ny tanànan’i Jerosalema. Mandre feo samihafa ianao. Fantatrao avy hatrany ny feon'i Jesôsy. Mahatalanjona anao izay lazainy, sarotra takarina izany ho an’ny mpianany. Raha nampamirapiratra ny tampon'ny tempoly vita amin’ny volamena ny masoandro mody ary nitaratra tahaka ny fangatsakatsaky ny ranomandry teo amin’ireo rindrina tsara tarehy vita amin’ny vatovandana, dia izao no nolazain’i Jesôsy tamin’ny fomba hentitra: “Lazaiko aminareo marina tokoa: tsy havela hisy vato hifanongoa eto ka tsy horavana" - Mat. 24:2. Very hevitra ireo mpianatra, ianareo koa toraka izany. Inona no tena tian’i Jesôsy hambara amin’ireo teny ireo? Inona no ifandraisan’izany amin’ny fiafaran’izao tontolo izao izay nanontanian’ireo mpianatr’i Jesôsy?
Mihaino am-pahalianana fatratra ianao raha mitantara am-pahakingana ireo toe-javatra izay hitarika ho amin'ny fandravana an’i Jerosalema sy izay hiseho mialoha ny fiverenany indray i Jesôsy. Hitantsika ao amin’ny fandravana an’i Jerosalema ny tandindon’ny paikadin’i Satana mba hamitahana sy handringanana ny vahoakan'Andriamanitra amin’ny andro farany. Manondro mazava ireo toe- javatry ny andro farany, ao anatin’ny tontolon-kevitry ny faharavan’i Jerosalema, ny torolalana nomen’i Jesôsy ao amin’ny Mat. 24.
Hodinihintsika ny momba ireo paikady roa nataon'i Satana hamitahana sy handringanana ny vahoakan’Andriamanitra. Izay tsy azon’ilay ratsy atao amin’ny alalan’ny fanenjehana dia antenainy hotanterahina amin’ny alalan’ny marimaritra iraisana. Tsy misy zavatra tampoka amin'Andriamanitra, ary na dia amin’ny fotoan-tsarotra indrindra aza dia miaro ny olony Izy.