Vakio ny 1 Tant. 16:7; Neh. 12:8; Sal. 18:1; Sal. 30:1; Sal. 92:1; Sal. 95:2; Sal. 105:2; Kôl. 3:16 ary ny Jak. 5:13. Inona avy ireo toe-javatra izay nahatonga ny fanoratana ny Salamo? Oviana no nampiasan’ny vahoakan’ Andriamanitra ny Salamo?
Nosoratana mba hampiasaina amin’ny fivavahana manokana na amin’ny fiaraha-mivavaka ny Salamo. Nohiraina nandritra ny fanompoam-pivavahana tany amin’ny tempoly izany, araka ny lahatsoratra momba ny hira izay miresaka mikasika ny zava-maneno (Sal. 61:1), sy ny feon-kira (Sal. 9:1) ary ny mpiventy hira (Sal. 8:1).
Ao amin’ny Baiboly hebreo, ny anarana iantsoana ny bokin’ny Salamo, tehilim, “fiderana”, dia maneho ny tanjony: ny fiderana an’Andriamanitra.
Ampahany nanan-danja tao amin’ny fanompoam-pivavahan’ny Isiraely fahiny ny Salamo. Nampiasaina tamin’ny fitokanana ny tempoly ohatra izany, nampiasaina koa nandritra ireo andro firavoravoana ara-pivavahana, nandritra ny diabe, ary tamin’ny fotoana nametrahana ny fiaran’ny fanekena tany Jerosalema.
Ny “fihirana fiakarana" (Sal. 120-134), izay fantatra ihany koa amin’ny hoe hiran’ny fivahiniana, dia nohiraina nandritra ny dia nankanesana tany Jerosalema tamin’ireo andro firavoravoana telo lehibe (Eks. 23:14-17). Nohiraina nandritra ireo andro firavoravoana telo lehibe fanao isan-taona ny “Hallel egiptianina” (Sal. 113-118) sy ny “Hallel” lehibe (Sal. 136); anisan’ireo andro firavoravoana ireo ny voaloham-bolana sy ny fanokanana ny tempoly. Nanana anjara toerana lehibe tao anatin’ny fanompoam-pivavahan’ny Paska ny "Hallel egiptianina”. Nohiraina tamin’ny fanombohan’ny fisakafoana tamin’ny Paska ny Sal. 113 sy 114, ary ny Sal. 115-118 no nohiraina tamin’ny fiafaran’izany (Mat. 26:30). Ny “Hallel fanao isan’andro” kosa (Sal. 145-150) dia nampidirina tao amin’ny vavaka isan’andro nandritra ny fanompoam-pivavahana maraina tao amin’ny synagoga.
Tsy nanaraka ny olona tamin’ny fanompoam-pivavahana nataony fotsiny ny Salamo fa nanoro lalana azy koa ny amin’izay fomba tokony hiankohofany amin’Andriamanitra tao amin’ny fitoerana masina. Ny teny ao amin’ny Sal. 22 no nentin’i Jesôsy nivavaka (Mat. 27:46). Nanana toerana manan-danja teo amin’ny fiainan’ny fiangonana voalohany koa ny Salamo (Kôl. 3:16; Efes. 5:19).
Marina tokca fa tsy mivavaka amin’Andriamanitra ao amin’ny fitoerana masina tety an-tany tahaka ny tempoly isika; na izany aza, ahoana no ampiasantsika ny Salamo eo amin'ny fiankohofantsika, na ataontsika any amin’ny mangingina izany na iarahantsika amin'ny hafa?