Vakio ny Sal. 119: 103,104; Sal. 119: 147; sy ny Sal. 119: 104. Manao ahoana ny fandraisan'i Davida ny Tenin'Andriamanitra? Manao ahaoana ny akon'izany teo amin'ireo mpanavao fivavahana? Ary eo amin'ny fiainantsika ankehitriny?
Ny Baiboly no fototra niorenan'ny finoan'ireo mpanavao fivavahana sy votoatin'ny fampianarany. Takatr'izy ireo fa "ny tenin'Andriamanitra, izay velona sady maharitra" - 1 Pet. 1:23 no teo an-tanany. Sarobidy tamin'izy ireo ny voanteny tsirairay avy. Nohatanjahina ny finoan'izy ireo ary nohavaozina ny herim-pony raha namaky ireo takilany sy nino ireo teny fikasany. "Toy izany koa ny amin'ireo teny fikasana rehetra ao amin'ny Tenin'Andriamanitra. Miteny amintsika tsirairay Izy amin'ny alalan'ireny, toy ny miteny mivantana ka ny feony tokoa no rentsika. Ao amin'ireo teny fikasana ireo no ahazoan'i Kristy mampita amintsika ny fahasoavany sy ny heriny. 'Ravin'ny hazo izay fanasitranana ny firenena' ireny. Apôk . 22:2. Raha raisina ka tsakotsakoina izy ireny, dia manjary tanjaka ho an'ny toetra amam-panahy, hanentana sy hanohana ny fiainana. Tsy misy zavatra hafa manana hery manasitrana toy izany. Tsy misy zavatra hafa afaka hizara herim-po sy finoana toy izany ka hanome hery mamelombelona ny tena manontolo." — TM F, t. 71.
Mitondra fifaliana mampisava ny alahelontsika ny Soratra Masina, fanantenana ao anatin'ny hakiviantsika, ary fahazavana ao anatin'ny aizina misy antsika. Mitari-dalana antsika ao anatin'ny savorovoro izy, manome toky antsika ao anatin'ny fahaverezan-kevitra, mitondra hery hanampy amin'ny fahosantsika, ary fahendrena ho an'ny tsy fahalalantsika. Rehefa misaintsaina ny Tenin'Andriamanitra isika ka matoky amim-pinoana ny teny fikasany, dia hampahatanjaka ny tenantsika manontolo ny herin'Andriamanitra mpitondra fiainana, na ara-batana, na ara-tsaina, na ara-pihetseham-po, na koa ara-panahy.
Nofenoin'ireo mpanavao fivavahana Soratra Masina ny sainy. Niveloman'izy ireo ny Teny ary maro tamin'izy ireo no namoy ny ainy noho ny amin'ny Teny. Tsy mba toetran'ireo Kristianina ireo ny tsy rototra, na tsy miraika, na manao rainazy, na maneho fanoloran-tena ivelambelany. Fantany fa raha tsy miaraka amin'ny herin'ny Tenin'Andriamanitra dia tsy hahatohitra ny herin'ny ratsy mirohotra hamely azy izy ireo. Ny fanirian'i John Wycliffe dia ny handika ny Baiboly amin'ny teny anglisy hahafahan'ny olon-tsotra mamaky sy mahatakatra izany. Ary satria noraran'ny lalàna izany dia notsaraina izy noho ny finoany, ka voaheloka ho faty amin'ny maha-heretika azy. Nandritra ny fitsarana azy dia nanao antso avo i Wycliffe. "Araka ny fihevitrareo, (...) iza no iadianareo? Lahiantitra efa eo am-baravaram-pasana ve? Tsia! fa ny Fahamarinana, ny Fahamarinana izay mahery noho ianareo, ka haharesy anareo" — Wylie, b. 2, toko 13, voalaza ao amin'ny Hery Mifanandrina, t. 91. Tanteraka ireo tenin'i Wycliffe farany rehefa nampisava ny haizin'ny Vanim-potoana Antenantenany ny fahazavan'ny fahamarinan'Andriamanitra.
Fomba ahoana no efa nampaherezan'ny Soratra Masina anao tao anatin'ny fotoam-pitsapana?