Ampitahao amin'ny Apôk. 14:6,7 ny Dan. 7:9,10. Inona ny fitoviana hita eo amin'Ireo andininy roa ireo?
Lohahevitra mibahan-toerana ao amin'ny Baiboly ny fitsarana. "Fa ny atao rehetra dia ho entin'Andriamanitra ho amin'ny fitsarana ny zava-miafina rehetra, na soa na ratsy"- Mpitt. 12:14. Nampitodika ny sain'ny mpihaino azy ho amin'ny vanim-potoan'ny fitsarana ho avy i Jesosy, rehefa "hampamoahina ny olona amin'ny andro fitsarana noho ny amin'ny teny foana rehetra izay ataony' - Mat. 12:36. I Paoly Apôstôly dia nanampy hoe Andriamanitra "hampiharihary ny zavatra takona ao amin'ny maizina ka hampiseho ny fikasan'ny fo"- 1 Kôr. 4:5. Izao no nolazain'ilay anjely mpitondra hafatra tamin'i Jaona: "tonga ny andro fitsarany"(Apôk. 14:7).
Vakio ny Apôk . 22:10-12. Rehefa hiverina i Jesôsy dia inona no ho anjaran'ny olombelona rehetra? Inona ny fanambarana mazava natao tamin'i Jaona?
Satria tonga hizara ny valin'asa farany i Kristy dia tsy maintsy hisy fitsarana mialoha izany, mba hanehoana ny tsirairay handray ny valin'asany avy, amin'ny Fiaviany. Rehefa ho avy i Kristy dia tsy misy fotoana fanararaotra fanindroany intsony. Efa nandray fahalalana ampy handraisana fanapahan-kevitra farany sy tsy azo ivalozana ny olona tsirairay, na hiandany amin'i Kristy na tsia.
Vakio ny Mat. 25:1-13. Nahoana i Jesôsy no manana fifandraisana samy hafa tanteraka amin'ireo vondron'ny mpino roa ireo?
"Rehefa hifarana ny asa famotopotorana, rehefa voadinika sy tapaka ny momba an'ireo nisora-tena ho mpanaraka an'i Kristy mandritra ny taonjato nifandimby, amin'izay, ary, amin'izay ihany, vao mifarana ny androm-pahasoavana ka hikatona ny varavaram-pamindrampo. Ilay fehezan-teny fohy hoe: `ary izay efa niomana dia niara-niditra taminy tao amin'ny fampakaram-bady, ary dia narindrina ny varavarana' izany no mitondra antsika mamakivaky eo amin'ny asa fanompoana farany ataonlny Mpamonjy, ka tafahatra hatramin'ny fotoana izay hahatanteraka ny asa lehibe famonjena ny olona." - HM, t. 442.
Tsy tokony hatahotra ny fitsarana isika. Amin'ny alalan'i Kristy no ahazoantsika famelan-keloka, afaka amin'ny fanamelohana isika, manana hery hiaina fiainana araka an'Andriamanitra ary manana ny fandresena farany.