Ampitahao ny Jao. 17:15-17 sy ny Asa. 20:32. Inona ny fanazavana omen'i Jesôsy sy i Paoly apostôly antsika momba ny fiarovana amin'ny famitahan'i Satana?
Fanambarana tsy mety diso ny sitrapon'Andriamanitra ny Baiboly. Maneho ny drafitry ny lanitra ho famonjena ny olombelona izany. Ny "soratra rehetra nomen'ny tsindrimandrin'Andriamanitra" mantsy dia "mahasoa koa ho fampianarana, ho fandresen-dahatra, ho fanitsiana izay diso, ho fitaizana amin'ny fahamarinana" - 2 Tim. 3:16 . Izany hoe "ny Soratra Masina rehetra" dia avy amin'ny tsindrimandrin'Andriamanitra fa tsy ny ampahany fotsiny, na koa misy ampahany sasany ambony noho ny ampahany hafa. Tsy maintsy hekena ho Tenin'Andriamanitra ny Baiboly manontolo. Raha tsy izany dia hivoha midanadana ny varavarana hidiran'ny famitahana.
Ny Baiboly dia manambara mazava ny fitiavan'Andriamanitra tsy misy fetra ao anatin'ilay fifanandrinana lehibe. Mampiharihary ireo laingan'i Satana izany ary manambara ny famitahany. Halan'ny devoly ny Tenin'Andriamanitra ary ataony amin'ny fomba sy fotoana rehetra izay hanafoanana ny heriny.
Inona rahateo moa no ho fantatsika momba ny drafi-panavotana raha tsy misy ny Baiboly? Hatraiza no mety ho fahatakarantsika momba ny fahaterahana, ny fiainana, ny fampianarana ary ny asa fanompoana nataon'i Jesôsy ? Raha tsy misy ny Soratra Masina, azontsika atao ve ny hanomboka hahatakatra ny halehiben'ny sorona nataon'i Kristy, ny voninahitry ny fitsanganany tamin'ny maty, ny herin'ny fanelanelanana ataony sy ny fiezinezin'ny fiverenany fanindroany? Ireo fahamarinana lehibe rehetra ireo dia ambara, ampianarina ary asongadina ao amin'ny Tenin'Andriamanitra. lo Tenin'Andriamanitra io irery ihany no tokony ho fenitra farany sy ambony indrindra, hahazoana mahatakatra ny fahamarinana masina rehetra. Noho izany dia tokony hotoherintsika izay mety ho fiezahana rehetra hanambany ny fahefany (fahefan'ny Baiboly) na ny maha-avy amin'Andriamanitra azy, eny, na dia izay milaza ho manam-pitiavana fatratra ny Baiboly aza, kanefa mametraka fisalasalana momba izany, na ankolaka aza. Indrisy fa teolojianina sy kristianina maro no mifantoka loatra amin'ny lafiny maha-olombelona ao amin'ny Soratra Masina, indrindra vokatry ny fisainana môderina, ka tonga tenin'olombelona ny Baiboly raha tokony ho Tenin'Andriamanitra. "Ny Baiboly", hoy izy ireo, "dia nosoratana mpanjaka, mpiandry ondry, mpanjono, mpisorona, mpanao tononkalo sy olona maro hafa, izay niezaka nizara, araka ny fahatakarany azy, ny heviny sy fahazoany ny mikasika an'Andriamanitra tamin'ny androny sy ny toerana nisy azy."
Tena izany tokoa ve? Raha marina izany, nahoana isika izay miaina amin'izao fotoana izao, taonjato faha-21, no hihevitra fatratra ny amin'izay eritreretin'ireo olona ireo, na koa aza, hanao izany eritreriny izany ho fototry ny fanantenantsika ny mandrakizay?
Tsy tokony hanao izany isika, raha izany no izy.
Vakio ny Sal. 119:105,116,130,133, sy ny 160. Inona ny fanazavana omen'ny mpanao Salamo antsika mikasika ny maha-zava-dehibe ny Tenin'Andriamanitra ao amin'ny drafi-pamonjena?