"Voahombo miaraka amin'i Kristy amin'ny hazofijaliana aho, ary tsy izaho intsony no velona, fa Kristy no velona ato anatiko, fa izay ivelomako ankehitriny eo amin'ny nofo dia ivelomako amin'ny finoana ny Zanak'Andriamanitra, Izay efa tia ahy ka nanolotra ny tenany hamonjy ahy." - Gal. 2:20.
Mofon’aina:
Tsy handray zavatra latsaky ny fanoloran-tena tanteraka tsy misy fepetra Andriamanitra. Ny Kristianina mpanota, manana fo mizarazara dia tsy mba hiditra ny lanitra na oviana na oviana. Tsy hahita fifaliana any izy ireo (...).
Ny Kristianina marina dia mano-katra ny varavarankelin'ny fanahiny ho an'ny lanitra. Miara-miaina amin'i Kristy izy. Mifanaraka amin'ny sitrapon'i Kristy ny sitrapony. (...)
Tokony hiezaka hanatratra ny fenitra napetrak'Andriamanitra ho antsika isika ka hanao izany amin-kafanam-po sy amim-pitozoana. Aoka tsy hataontsika tahaka ny sazy izany fa ho tahaka ny fomba tokana hahazoana ny tena fahasambarana. Ny hany fomba hahazoana fiadanana sy fifaliana dia ny fananana fifandraisana velona amin'Ilay nanome fiainana antsika (...).
(...) Moa ve isika tsy hiezaka mafy mba ho tonga araka izay anirian'i Kristy antsika - Kristianina amin'ny asa sy amin'ny fahamarinana -mba hahitan'izao tontolo izao eo amin'ny fiainantsika ny fanehoana ny herin'ny fahamarinana izay mahavonjy? Ity tany ity no sekoly fanomanana antsika; mandritra izany no isetrantsika ireo fitsapana sy zava-tsarotra. Tsy hitsahatra ny hampivily antsika hiala amin'ny fahatokiana ilay fahavalon'Andriamanitra. Voaro anefa isika rehefa mifikitra amin'Ilay nanolotra ny ainy ho antsika. (...)
Maty teo amin'ny hazo fijaliana Izy mba handringanana ilay manana ny herin'ny fahafatesana ary koa mba hanaisotra ny fahotan'ny fanahy mino rehetra. Miantso antsika Izy mba hanolotra ny tenantsika eo amin'ny alitaran'ny fanompoana, ho fanatitra velona (...). Aoka hatolotsika an' Andriamanitra amin'ny fahafenoany ny momba antsika manontolo sy izay rehetra ananantsika.
Eto amin'ny sekoly eto an-tany no tokony hianarantsika ireo lesona manomana ny fidirantsika any amin'ilay sekoly ambony kokoa izay hitohizan'ny fianarantsika eo ambany fampianarana manokan'i Kristy. (...) Moa ve isika, amin'izao androm-pahasoavana vitsy sisa izao, tsy hitondra tena tahaka ny lehilahy sy vehivavy izay mikatsaka ny fiainana ao amin'ny fanjakan'Andriamanitra, dia ilay fahasambarana mandrakizay? - TDG, t. 145.